20.05.2026 | 12:47
Պուտինը և Սի Ցզինպինը գործընկերության ամրապնդման մասին հայտարարություն են ստորագրել
5-6 երեխա ունեցող ընտանիքների մեծ մասը գտնվում է մեր անապահովության համակարգում. Թորոսյան․ ՏԵՍԱՆՅՈՒԹ
Հասարակություն
09.01.2026 | 13:57
«Այդ գումարները հաճախ դառնում են պարզապես գումար աշխատելու միջոց, ու մենք, ցավոք սրտի, շատ բազմազավակ ընտանիքներ ունենք՝ 5+, 6+ երեխայով, որոնց մեծ մասը գտնվում է մեր անապահովության համակարգում»,- հրավիրված մամուլի ասուլիսի ժամանակ ասաց Աշխատանքի և սոցիալական հարցերի նախարար Արսեն Թորոսյանը՝ անդրադառնալով նոր ծնվող երեխայի համար տրվող գումարին։
Նախարարի դիտարկմամբ՝ միանվագ ծննդյան նպաստը մի հիմնական նպատակ ունի կամ պետք է ունենա՝ ծննդյան ժամանակ, նախածննդյան կամ ծննդից ինչ-որ ժամանակ հետո ծախսերի փոխհատուցումն է կամ մեղմումը՝ երեխայի ծննդով պայմանավորված.
«Մենք շարունակում ենք խրախուսել երրորդ և հաջորդ, հատկապես երրորդ և հաջորդ երեխայի ծնունդը մեր մշտական նպաստով, որը, ես ինչպես նշեցի, 6 տարվա ընթացքում դառնում է 4 միլիոն դրամից էլ ավելի: Ու միջազգային փորձն է դա ցույց տալիս, որ միանվագ տրվող գումարները հիմնականում արագ ծախսվում են, շատ արագ, և հետո երեխային աջակցելու համար այդ ընտանիքները, հատկապես բազմազավակ ընտանիքները, պարզապես գումար չեն ունենում: Դրա համար էլ մեր երրորդ և հաջորդ երեխայի ծննդյան նպաստը ամսական 50,000 դրամի չափով դարձել է մշտական, այսինքն՝ աջակցության ծրագիրը, որը ավարտվում էր 2025 թվականի դեկտեմբերի 31-ին, հիմա մշտական նպաստ է, որով մեր բոլոր քաղաքացիները, որոնք երրորդ և հաջորդ երեխա կունենան, մինչև 6 տարեկանը կստանան 50,000 դրամ: Մենք քիչ փող չենք պատրաստվում ծախսել դրա վրա, բայց պատրաստվում ենք գումարը ծախսել այնպես, որ դա իրոք ծախսվի երեխայի խնամքի, մեծացման և ընտանիքի աջակցման վրա, ոչ թե պարզապես այդ պահին»։
Մանրամասները՝ տեսանյութում։
