Միրզոյանն ու Իրանի ԱԳ փոխնախարարը քննարկել են Հայաստան–Իրան երկկողմ հարաբերությունների զարգացման հարցեր

ՀՀ արտաքին գործերի նախարար Արարատ Միրզոյանը Երևանում ընդունել է Իրանի Իսլամական Հանրապետության ԱԳ նախարարի տեղակալ Մաջիդ Թախթ Ռավանչիին՝ քննարկելու Հայաստան–Իրան քաղաքական խորհրդակցությունների օրակարգը, երկկողմ հարաբերությունների խորացումն ու տարածաշրջանային ենթակառուցվածքների ապաշրջափակման հարցերը։ Այս մասին տեղեկացնում են ՀՀ ԱԳՆ-ից։

«Քննարկվել են Հայաստան–Իրան երկկողմ հարաբերությունների զարգացման հարցեր. երկուստեք ընդգծվել է հարաբերությունները ռազմավարական մակարդակի բարձրացնելու հարցում արտահայտված քաղաքական համաձայնությունն, անդրադարձ է կատարվել այդ ուղղությամբ իրականացվող աշխատանքներին։

Նախարար Միրզոյանն իր խոսքում նշել է. «Մենք, հասկանալիորեն, մեծ կարևորություն ենք տալիս մեր հարևան և բարեկամ Իրանի հետ հարաբերություններին: Ըստ էության, մեզ համար դրանք ռազմավարական նշանակության հարաբերություններ են: Եվ պատահական չէ, որ նախագահ Փեզեշքիանը և վարչապետ Փաշինյանը պայմանավորվել են, որ այս՝ արդեն ընթացիկ, տարում մեր հարաբերությունները պաշտոնապես բարձրացնենք ռազմավարական գործընկերության մակարդակի»:

Արարատ Միրզոյանը և Մաջիդ Թախթ Ռավանչին մտքեր են փոխանակել տարածաշրջանային ենթակառուցվածքների ապաշրջափակման հարցերի շուրջ։ ՀՀ ԱԳ նախարարն ընդգծել է ՀՀ հստակ դիրքորոշումն առ այն, որ ենթակառուցվածքների ապաշրջափակումը տեղի է ունենալու հիմնարար սկզբունքների շրջանակներում։ Անդրադարձ է կատարվել այս ուղղությամբ մշակվող ծրագրերին և դրանց միջոցով ընձեռնվող հնարավորություններին»,- ասված է հաղորդագրությունում։