19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Թրամփը Վենեսուելայից պահանջել է խզել տնտեսական կապերը ՌԴ-ի և Չինաստանի հետ. ABC News
Քաղաքականություն
07.01.2026 | 15:29
ԱՄՆ նախագահ Դոնալդ Թրամփի վարչակազմը պահանջել է, որ Վենեսուելայի ժամանակավոր նախագահ Դելսի Ռոդրիգեսը Ռուսաստանին, Չինաստանին, Իրանին և Կուբային «վտարի» երկրից ու խզի նրանց հետ տնտեսական կապերը։ Այս մասին հաղորդում է ABC News-ը՝ հղում անելով Սպիտակ տան ծրագրերին ծանոթ աղբյուրներին, փոխանցում է Meduza-ն։
Վենեսուելան պետք է նաև համաձայնվի համագործակցել բացառապես Միացյալ Նահանգների հետ նավթի արդյունահանման հարցում և ծանր նավթի վաճառքի հարցում նախապատվությունը տալ ԱՄՆ-ին, նշել են հեռուստաալիքի աղբյուրները։ Թրամփի վարչակազմի ծրագրի համաձայն՝ Վենեսուելայի իշխանությունները պետք է բավարարեն Վաշինգտոնի պահանջները՝ նախքան նրանց թույլատրվի ավելի շատ նավթ արդյունահանել։
ԱՄՆ պետքարտուղար Մարկո Ռուբիոն հունվարի 5-ին Կոնգրեսի անդամների հետ փակ ճեպազրույցի ժամանակ հայտարարել է, որ Վաշինգտոնը կարող է ստիպել Վենեսուելային ձեռնարկել այդ քայլերը, քանի որ նրա նավթատարները լցված են։ Պետքարտուղարի խոսքով՝ Կարակասին մնացել է ընդամենը մի քանի շաբաթ, մինչև այն ֆինանսապես անվճարունակ կդառնա՝ առանց իր նավթային պաշարները վաճառելու։
Թրամփն էլ Truth Social սոցիալական ցանցում գրել է, որ Վենեսուելայի ժամանակավոր իշխանություններն ԱՄՆ-ին կփոխանցեն 30-ից 50 միլիոն բարել սանկցիաների տակ գտնվող նավթ։
Հունվարի 6-ին Politico-ն հաղորդել էր, որ Թրամփի վարչակազմը մի քանի պայմաններ է առաջադրել Վենեսուելայի ժամանակավոր նախագահին: Ըստ տեղեկության՝ ԱՄՆ-ը պահանջել է, որ Դելսի Ռոդրիգեսը կատարի առնվազն երեք պահանջ․ դադարեցնի թմրանյութերի ապօրինի շրջանառությունը, վտարի իրանցի, կուբացի ու «Վաշինգտոնի նկատմամբ թշնամաբար տրամադրված այլ գործակալներին», դադարեցնի նավթի վաճառքը ԱՄՆ հակառակորդներին:
Բացի այդ, ԱՄՆ պաշտոնյաներն ակնկալում են, որ Ռոդրիգեսը կնպաստի Վենեսուելայում ազատ ընտրություններին և, ի վերջո, հրաժարական կտա:
Թարգմանությունը՝ Էմմա Չոբանյանի
