«Մինուճար տղայիս կյանքից զրկեցին, դեմ եմ «Սասնա ծռերին» ազատ արձակելուն․ ՊՊԾ-ում սպանված ոստիկանի մայր

Համաներման մասին օրենքն այսօրվանից գործում է։ Արդեն իսկ ազատ է արձակվել «Ցեղակրոն» կուսակցության հիմնադիր առաջնորդ Շանթ Հարությունյանը։ Համաներումը կտարածվի նաև «Սանա ծռեր» խմբի անդամների վրա, սակայն ՊՊԾ գնդի գրավման օրերին սպանված ոստիկանների հարազատները դեմ են այդ որոշմանը։

Այդ օրերին մահացած ոստիկան Գագիկ Մկրտչյանի մայրը՝ տիկին Անահիտը, Factor.am-ին ասաց՝ համաներումը չպետք է տարածվեր խմբի անդամներից և ոչ մեկի վրա․«Բոլորովին համաձայն չեմ այդ համաներմանը, պիտի պատժվեն։ Բոլորն էլ մի խումբ են, համախմբված մտել են պետական կառույց և սպանել մարդկանց, ի՞նչ կապ ունի, թե կոնկրետ որ մեկին է սպանությունը վերագրվում։ Նրանցից ամեն մեկն իր արածի չափով պիտի պատժվի, նրանք չպիտի ազատություն տեսնեն»։

Տիկին Անահիտն ասում է, որ մարդասիրությունից ելնելով իշխանությունները կարող էին «Սասնա ծռեր» խմբի՝ կարիքի մեջ գտնվող անձանց նյութական օգնություն ցուցաբերել, բայց ոչ համաներման արժանացնել․ «Թող մտածեին աղքատ, հիվանդ մարդկանց օգնեին, հացի փող հայթայթեին, ոչ թե առանց խղճի խայթ զգալու կրակողներին ազատ արձակեին։ Մինուճար տղայիս կյանքից զրկեցին, ի՞նչ համաներման մասին է խոսքը։ Դեմ եմ նրանց ազատելուն, նրանք պիտի պատժվեն»։

Նշենք, որ համաներումը չի վերաբերվում խմբի բոլոր անդամներին, մասնավորապես Սմբատ Բարսեղյանն ու Արմեն Բիլյանը շարունակում են մնալ անազատության մեջ։ Խմբի հենց այս երկու անդամներին են մեղսագրվում ոստիկանության աշխատակիցների սպանությունները։

Լիլիթ Շաբոյան