28.04.2026 | 12:12
Հրապարակվել են ԱԺ ընտրությունների նախնական ընտրացուցակները
ԵՄ-ն պատժամիջոցների ցանկում ներառել է Ռուսաստանի «ստվերային նավատորմի» ևս 41 լցանավ
Քաղաքականություն
18.12.2025 | 18:51
ԵՄ Խորհուրդը պատժամիջոցներ է կիրառել Ռուսաստանի «ստվերային նավատորմի» ևս 41 լցանավերի նկատմամբ։ Ցանկում ներառված են նավեր, որոնք, պատժամիջոցներին հակառակ, տեղափոխում են ռուսական նավթ, ինչպես նաև «նավեր, որոնք պատասխանատու են Ռուսաստանի համար ռազմական տեխնիկա տեղափոխելու կամ Ուկրաինայից գողացված ուկրաինական հացահատիկի և մշակութային արժեքների տեղափոխման համար», ասվում է Խորհրդի հայտարարության մեջ, գրում է The Insider-ը։
Այսպիսով, ԵՄ պատժամիջոցների ցանկում գտնվող «ստվերային նավատորմի» նավերի ընդհանուր թիվը հասնում է գրեթե 600-ի։
«ԵՄ-ն կշարունակի մեծացնել ճնշումը Ռուսաստանի և ստվերային նավատորմի վրա, այդ թվում՝ լրացուցիչ պատժամիջոցների ներդրման միջոցով»,- ասվում է հայտարարության մեջ։
Դեկտեմբերի սկզբին Reuters-ը, հղում անելով իր աղբյուրներին, հաղորդել էր, որ G7-ի երկրներն ու Եվրամիությունը բանակցություններ են վարում ռուսական նավթի փոխադրման ծովային ծառայությունների լիակատար արգելքի շուրջ, որը կփոխարինի ռուսական նավթի գների շեմի սահմանափակմանը։
Ներկայում ռուսական նավթի մեկ երրորդից ավելին արտահանվում է (հիմնականում՝ Հնդկաստան և Չինաստան) ԵՄ երկրների, հիմնականում Հունաստանի, Կիպրոսի և Մալթայի ընկերությունների կողմից վերահսկվող նավերով։ Մոսկվան արդեն իսկ մնացած նավթը տեղափոխում է «ստվերային նավատորմի» միջոցով՝ գների սահմանափակումը շրջանցելու համար։ Lloyd’s List Intelligence-ի տվյալներով՝ Ռուսաստանից, Իրանից և Վենեսուելայից պատժամիջոցների տակ գտնվող նավթը փոխադրողների համակցված ցանցը ներառում է ավելի քան 1400 նավ։
Բացի այդ, Մեծ Բրիտանիան նույնպես ընդլայնել է Ռուսաստանի դեմ պատժամիջոցները։ Բրիտանիայի կառավարությունը պատժամիջոցներ է կիրառել ևս 24 ռուս անհատների և կազմակերպությունների նկատմամբ։ «Տատնեֆտ», «Ռուսնեֆտ» և «Ռուսնեֆտեգազ» նավթային ընկերություններն ավելացվել են պատժամիջոցների ցանկում։
Թարգմանությունը՝ Էմմա Չոբանյանի
