30.10.2026 | 15:55
Հոկտեմբերի 31-ին Հայաստանում օդի ջերմաստիճանը կբարձրանա մինչև 7 աստիճանով
Ադրբեջանն ու Թուրքիան միմյանց ռազմական օգնություն կցուցաբերեն ագրեսիայի դեպքում
Քաղաքականություն
16.12.2025 | 21:58
Ադրբեջանի Միլլի Մեջլիսը (խորհրդարանը) վավերացրել է Ադրբեջանի և Թուրքիայի պաշտպանության նախարարությունների միջև փոխըմբռնման հուշագիրը։ Այսօր խորհրդարանի լիագումար նիստում քննարկվել է «Ադրբեջանի Հանրապետության պաշտպանության նախարարության և Թուրքիայի Հանրապետության ազգային պաշտպանության նախարարության միջև փոխադարձ ռազմական անվտանգության ամրապնդման վերաբերյալ փոխըմբռնման հուշագիրը» հաստատելու մասին օրինագիծը։
Օրինագծի ներկայացման ժամանակ Միլլի Մեջլիսի պաշտպանության, անվտանգության և կոռուպցիայի դեմ պայքարի հանձնաժողովի նախագահ Արզու Նագիևը նշել է, որ հուշագրի համաձայն՝ կողմերից մեկի դեմ զինված ագրեսիայի դեպքում հուշագրի կողմերը պարտավորվում են փոխադարձ օգնություն ցուցաբերել ՄԱԿ-ի կանոնադրության 51-րդ հոդվածում ամրագրված անհատական և կոլեկտիվ ինքնապաշտպանության իրավունքն իրականացնելու համար։
Կողմերը միմյանց ռազմական օգնություն են ցուցաբերում կողմերից մեկի խնդրանքով և իրենց ազգային օրենսդրությամբ սահմանված ընթացակարգերին համապատասխան։
«Հուշագիրը վերաբերում է միայն ռազմական համագործակցության և ռազմական անվտանգության հարցերին, և այս շրջանակներում այն նախատեսում է միայն փոխադարձ օգնություն պաշտպանության, վարժանքների, մատակարարումների և կողմերի համատեղ գործելու կարողության բարձրացման ոլորտներում։ Փոխըմբռնման հուշագիրը իրականացվում է միջազգային իրավունքի նորմերին և սկզբունքներին համապատասխան, ուղղված չէ երրորդ երկրների դեմ և նպաստում է տարածաշրջանում խաղաղության և անվտանգության ամրապնդմանը»,- ասել է Նագիևը։
Քննարկումներից հետո խորհրդարանականները քվեարկել են օրինագիծն առաջին ընթերցմամբ ընդունելու օգտին։
Հուշագիրը ստորագրվել է 2025 թվականի հուլիսի 22-ին Ստամբուլում՝ Ադրբեջանի և Թուրքիայի պաշտպանության նախարարների կողմից։
Թարգմանությունը՝ Էմմա Չոբանյանի
