Պուտինը հայտարարել է, որ «ԴԺՀ-ն և ԼԺՀ-ն ցանկացած դեպքում կազատագրվեն»

Ռուսաստանի նախագահ Վլադիմիր Պուտինը հայտարարել է, թե ինքնահռչակ Դոնեցկի և Լուգանսկի ժողովրդական հանրապետությունների տարածքները «կազատագրվեն ցանկացած դեպքում», գրում է Meduza-ն։

«Ամեն ինչ հանգում է դրան։ Կա՛մ մենք ազատագրում ենք այս տարածքները զենքի ուժով, կա՛մ ուկրաինական զորքերը կլքեն այդ տարածքները և կդադարեցնեն այնտեղ կռվել»,- ասել է Պուտինը India Today-ին տված հարցազրույցում։

Նրա խոսքով՝ Ուկրաինայի այդ շրջանների բնակիչները «քվեարկել են անկախության օգտին»։

«Մենք անմիջապես ասացինք Ուկրաինային, ուկրաինական զորքերին. ժողովուրդը չի ուզում ապրել ձեզ հետ, դուրս բերեք ձեր զորքերը, և ռազմական գործողություններ չեն լինի։ Ոչ, նրանք նախընտրեցին կռվել, և հիմա նրանք  կռվում են»,- հայտարարել է Ռուսաստանի նախագահը։

Բացի այդ, Պուտինն առաջին անգամ անձամբ մեկնաբանել է Կրեմլի բանակցությունները ԱՄՆ հատուկ բանագնացներ Սթիվ Ուիթկոֆի և Ջարեդ Քուշների հետ, որոնք տեղի են ունեցել երեքշաբթի։ Հանդիպումը երկար է տևել, քանի որ պետք է քննարկեին խաղաղության առաջարկների յուրաքանչյուր կետը։ Պուտինի խոսքով՝ ամերիկյան կողմը խաղաղության ծրագրի 28 կետերը բաժանել է չորս փաթեթի և առաջարկել է դրանք առանձին քննարկել։

«Հասնել նրան, որ հակամարտող կողմերը գան որոշակի կոնսենսուսի, հեշտ գործ չէ»,- հայտարարել է Պուտինը:

Հարցին՝ արդյո՞ք կան կետեր, որոնց հետ Ռուսաստանը համաձայն չէ, նա պատասխանել է. «Այո, կային նման հարցեր, և մենք դրանք քննարկել ենք»։

Միևնույն ժամանակ, Ռուսաստանի նախագահը պնդել է, որ «ամերիկացի գործընկերների ներկայացրածն այս կամ այն ​​կերպ հիմնված էր Ալյասկայում նախագահ Թրամփի հետ ձեռք բերած պայմանավորվածությունների վրա»։

«Մեծ Ութնյակ» (G8) վերադառնալու ցանկության մասին հարցին էլ Պուտինը բացասական է պատասխանել։ Ռուսաստանի նախագահը նշել է՝ «պատահել է», որ ինքը գործնականում դադարեցրել է մասնակցել G8-ի հանդիպումներին։

«Ես իսկապես չեմ հասկանում, թե ինչու են G7-ի մաս կազմող երկրներն իրենց անվանում G7։ Ի՞նչն է դրանում մեծ»,- հայտարարել է Պուտինը՝ հավելելով, որ դա «մնում է կարևոր հարթակ. նրանք աշխատում են, քննարկում են հարցեր և որոշումներ կայացնում»։

Թարգմանությունը՝ Էմմա Չոբանյանի