Ընդդիմությունը կեղծեց, թե ՔՊ-ի վարկանիշը պլինտուսի մակարդակի է. հաղթեցի՛նք․ լավատես եմ՝ Գյումրիի սցենարը չի կրկնվի․ Ռուբեն Ռուբինյան. ՏԵՍԱՆՅՈՒԹ

Ազգային ժողովի փոխխոսնակ, «Քաղաքացիական պայմանագիր» կուսակցության վարչության անդամ Ռուբեն Ռուբինյանը Factor TV-ի հետ զրույցում պնդում է, որ Վաղարշապատում «Քաղաքացիական պայմանագրի» հաղթանակը պայմանավորված է երկու հիմնական գործոնով։ Առաջինը տեղական ինքնակառավարման մարմինների ընտրությունն է, որտեղ Արգիշտի Մեխակյանը որպես համայնքապետ ստացել է դրական գնահատական։ Երկրորդը ընդդիմության կողմից տարվող քարոզարշավն էր, որը կենտրոնացած էր իշխանությանը «դավաճան» անվանելու և

«Վեհարանի վրա հարձակվելու» մեղադրանքների վրա։ Ըստ նրա՝ այս մեղադրանքները չեն համապատասխանում իրականությանը և ընտրողները իրենց քվեով ցույց են տվել իրենց վստահությունը «Քաղաքացիական պայմանագրի» նկատմամբ:

Ռուբինյանը հերքում է այն մեղադրանքները, թե իշխանությունը Էջմիածնում հաղթել է ՀՀԿ-ի մեթոդներով՝ խոշորացնելով համայնքները և միացնելով գյուղերը քաղաքին։ Նա պնդում է, որ «Քաղաքացիական պայմանագիրը» հաղթել է նաև Էջմիածին քաղաքում, և որ իրենք նախկինում էլ երկու անգամ հաղթել են այնտեղ։ Նրա խոսքով, խոշորացման նպատակը ոչ թե ընտրական ձայներ շահելն էր, այլ համայնքում առկա խնդիրների լուծումը և թարմացումը:

Ռուբինյանը մեկնաբանել է նաև Էդմոն Մարուքյանի դեսպան նշանակվելու շուրջ ստեղծված իրավիճակը։ Նա հերքում է Մարուքյանի պնդումը, թե ինքը ընդամենը «մեսենջեր» է եղել և Փաշինյանի առաջարկն է փոխանցել։ Ռուբինյանը նշում է, որ Մարուքյանն ինքն է բազմիցս խնդրել իրեն միջնորդել, որպեսզի ինչ-որ պաշտոն ստանա պետական կառավարման համակարգում։ Ռուբինյանը խոստովանում է, որ ինքն է միջնորդել Մարուքյանի նշանակման համար և զղջում է դրա համար:

Ռուբինյանը հրաժարվեց մեկնաբանել Արշակ արքեպիսկոպոս Խաաչատրյանին վերագրվող տեսանյութը՝ պատճառաբանելով, որ անթույլատրելի է մարդու անձնական կյանք ներխուժելը։ Միևնույն ժամանակ, նա նշում է, որ իշխանական ուժի բոլոր ներկայացուցիչները դատապարտել են այդ երևույթը։

Ինչ վերաբերում է վարչապետի կողմից Եզրաս սրբազանին ԿԳԲ-ի գործակալ լինելու մեջ մեղադրելուն, Ռուբինյանի խոսքով՝ դժվար է ասել, թե արդյոք դա ենթակա է քրեական հետապնդման, քանի որ տեղի է ունեցել երկար տարիներ առաջ։ Սակայն նա կարծում է, որ Եզրաս սրբազանը պետք է արձագանքի այդ մեղադրանքին, քանի որ դա քաղաքական մեղադրանք է:

Ռուբինյանը համոզված է, որ 2026 թվականի ընտրություններում «Քաղաքացիական պայմանագիրը» կրկին կհաղթի։ Նա կարծում է, որ Գյումրիի սցենարը, որտեղ հաղթեց ընդդիմությունը, իսկ քաղաքապետը ձերբակալվեց կաշառքի մեղադրանքով, չի կրկնվի համապետական մակարդակով։ Ռուբինյանը նաև քննադատում է Ռոբերտ Քոչարյանի այն տեսակետը, թե Հայաստանը պետք է իր տարածքից դուրս հավակնություններ ունենա՝ դա համարելով պատերազմի կոչ և խաղաղության գաղափարին հակասող պնդում:

Հաղորդումն ամբողջությամբ՝ տեսանյութում։

Ռոբերտ Անանյան