01.11.2026 | 21:56
Լրագրողներն այցելել են բանակային դիրք ու ամրացված շրջան, հանդիպել Սուրեն Պապիկյանի հետ
Քաղաքական խորհրդակցություններ` ՀՀ-ի և Հնդկաստանի ԱԳՆ-ների միջև. ստորագրվել է համաձայնագիր
Քաղաքականություն
07.11.2025 | 21:25
Նոյեմբերի 7-ին Երևանում կայացել են Հայաստանի և Հնդկաստանի արտաքին գործերի նախարարությունների 11-րդ քաղաքական խորհրդակցությունները, որոնց ընթացքում կողմերը քննարկել են երկկողմ համագործակցության ընդլայնման հնարավորությունները կրթության, մշակույթի, առևտրի, բարձր տեխնոլոգիաների, առողջապահության և զբոսաշրջության ոլորտներում, ինչպես նաև ստորագրել են հանրային առողջապահության և բժշկագիտության ոլորտներում համագործակցության մասին համաձայնագիր: Այս մասին տեղեկացնում են ՀՀ ԱԳՆ-ից։
Ըստ գերատեսչության՝ 11-րդ քաղաքական խորհրդակցությունները տեղի են ունեցել ՀՀ ԱԳ նախարարի տեղակալ Մնացական Սաֆարյանի և Հնդկաստանի ԱԳ նախարարի տեղակալ, Արևմտյան ուղղության հարցերով քարտուղար Սիբի Ջորջի գլխավորությամբ:
«Կողմերը քննարկել են երկկողմ օրակարգի հարցերի լայն շրջանակ՝ արձանագրելով Հայաստանի և Հնդկաստանի միջև դինամիկ փոխգործակցությունը, ինչպես նաև քաղաքական երկխոսության հետագա խորացման հնարավորությունները:
Երկուստեք ընդգծվել է փոխադարձ հետաքրքրություն ներկայացնող ոլորտներում, այդ թվում՝ կրթության և մշակույթի, առևտրի, բարձր տեխնոլոգիաների, հաղորդակցության, առողջապահության, զբոսաշրջության բնագավառներում համագործակցության ընդլայնման և խորացման ուղղությամբ քայլեր ձեռնարկելու պատրաստակամությունը: Անդրադարձ է կատարվել միջազգային հարթակներում կողմերի միջև փոխշահավետ համագործակցության հետագա զարգացմանը:
Մտքեր են փոխանակվել տարածաշրջանային և միջազգային նշանակության հարցերի շուրջ: ԱԳ նախարարի տեղակալը գործընկերոջը ներկայացրել է Հայաստանի կողմից առաջ մղվող խաղաղության օրակարգը, այդ թվում՝ ՀՀ կառավարության «Խաղաղության խաչմերուկ» նախաձեռնության համատեքստում վերջին զարգացումները:
Հնդկաստանի ԱԳՆ պատվիրակությունն այցելել է Հայոց ցեղասպանության հուշահամալիր և հարգանքի տուրք մատուցել ցեղասպանության զոհերի հիշատակին:
Խորհրդակցությունների շրջանակներում ստորագրվել է «Հայաստանի Հանրապետության առողջապահության նախարարության և Հնդկաստանի Հանրապետության առողջապահության և ընտանեկան բարեկեցության նախարարության միջև հանրային առողջապահության և բժշկագիտության ոլորտներում համագործակցության մասին համաձայնագիրը»,- ասված է հաղորդագրության մեջ:
