13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
ՇՄ նախարարն ԱՄԷ պատվիրակության հետ քննարկել է CoP17-ի նախապատրաստական աշխատանքները
Տնտեսություն
06.11.2025 | 21:44
Շրջակա միջավայրի նախարար Համբարձում Մաթևոսյանը հանդիպել է Արաբական Միացյալ Էմիրությունների պատվիրակության հետ՝ քննարկելով բնապահպանության, կլիմայի փոփոխության, կրթության և կայուն զարգացման ոլորտներում համագործակցության ընդլայնման հարցերը։ Կողմերը նաև անդրադարձել են ՄԱԿ-ի Կենսաբազմազանության մասին կոնվենցիայի կողմերի համաժողովի՝ #CoP17-ի նախապատրաստական աշխատանքներին և էմիրաթական փորձի կիրառման հնարավորություններին։ Այս մասին տեղեկացնում են ՀՀ շրջակա միջավայրի նախարարությունից։
«Շրջակա միջավայրի նախարար Համբարձում Մաթևոսյանը ընդունել է Արաբական Միացյալ Էմիրությունների պատվիրակությանը, որի կազմում էին Հայաստանում ԱՄԷ-ի արտակարգ և լիազոր դեսպան տիկին Նարիման Ալ-Մուլլան, Շարժայի խորհրդատվական խորհրդի նախագահ, ԱՄԷ-ի կլիմայի փոփոխության և շրջակա միջավայրի նախկին նախարար Աբդուլլա Բելհաիֆ Ալ Նուաիմին, ինչպես նաև Առաջնորդների դպրոցի հիմնադիր Սամվել Մովսիսյանը։
Կողմերը քննարկել են երկու երկրների միջև համագործակցության ընդլայնման և խորացման հնարավորությունները՝ մասնավորապես բնապահպանության, կլիմայի փոփոխության, կրթության և կայուն զարգացման ոլորտներում։
Հանդիպման ընթացքում անդրադարձ է կատարվել նաև թափոնների կառավարման համակարգերի բարելավման, բնապահպանական նորարար տեխնոլոգիաների ներդրման և փորձի փոխանակման հարցերին»,- ասված է հաղորդագրությունում։
Գերատեսչության փոխանցմամբ՝ կարևորվել է ՄԱԿ-ի Կենսաբազմազանության մասին կոնվենցիայի կողմերի համաժողովի՝ #CoP17-ի նախապատրաստական գործընթացը։ Քննարկվել են էմիրաթական փորձի համադրման հնարավորությունները՝ համաժողովի շրջանակում արդյունավետ համագործակցության նպատակով։
Նախարար Մաթևոսյանը ներկայացրել է Հայաստանում կազմակերպվող #CoP17 համաժողովի օրակարգը, որի առանցքային թեմաներն ուղղված են բնապահպանական քաղաքականության գլոբալ վերանայմանը և միջազգային մակարդակով կայացվող որոշումների համադրմանը՝ ի նպաստ շրջակա միջավայրի պահպանությանը և կայուն զարգացմանը:
