Փող տուր՝ մտիր ՔՊ ցուցակ. Փաշինյանի կուսակցությունը թեկնածուների ընդունելություն է հայտարարում. ՏԵՍԱՆՅՈՒԹ

Նիկոլ Փաշինյանի ղեկավարած «Քաղաքացիական պայմանագիր» կուսակցությունը մի քանի օր առաջ պաշտոնապես հայտարարեց, որ սկսվել են 2026 թվականի նախընտրական ցուցակի ձևավորման աշխատանքները։ ՔՊ-ն, որի իշխանության տարիներին Արցախն անցել է Ադրբեջանի վերահսկողության ներքո, պատերազմի հետևանքով հայկական կողմը զոհեր և վիրավորներ է ունեցել, ՀՀ ինքնիշխան տարածքներ են օկուպացվել, առաջարկում է 1,5 մլն դրամ վճարել ու ընդգրկվել իր նախընտրական ցուցակում։

Ըստ Փաշինյանի ղեկավարած ուժի՝ պատգամավոր դառնալու համար կարող են առաջադրվել թե՛ կուսակցականները, թե՛ անկուսակցականները։ ՔՊ-ական չհանդիսացող անձինք պետք է նաև ՔՊ վարչության կազմից որևէ մեկի երաշխավորությունը ստանան։

ՔՊ վարչության նախագահ Նիկոլ Փաշինյանն այսօր Factor TV-ի հարցին ի պատասխան՝ պարզաբանեց, թե ինչու են կուսակցականներից և անկուսակցականներից պարտադիր վճար պահանջում։

ՔՊ ցուցակում ընդգրկվելու ցանկություն, բայց գումար չունեցողներին էլ Փաշինյանը տարբերակ է առաջարկում՝ ինչպես հավաքել ու իր ղեկավարած ուժին փոխանցել 1,5 մլն դրամը։

Նիկոլ Փաշինյանի իմիջին համապատասխան լուսանկարի փնտրտուքի մեջ գտնվող ՔՊ-ական Ջուլիետա Ազարյանը կուսակցության այս գործելաոճը համարում է ևս մեկ քայլ դեպի ժողովրդավարություն: Ըստ նրա՝ մեկ կամ մի քանի հոգի չի որոշում ՔՊ-ի նախընտրական ցուցակը։ Արդյո՞ք ՔՊ-ն չի ձևավորում հարուստների, այլ ոչ թե գաղափարակիցների նախընտրական ցուցակ, հետաքրքրվեցինք ՔՊ-ականից։

Փաշինյանին բոլոր նախաձեռնություններում աջակցող Ազարյանը նշում է՝ ՔՊ-ի հայտարարությունից հետո ակտիվ առաջադրվում են թեկնածուները։

Նկատենք, սակայն, որ պատգամավորի նշած առաջադրվողները, ըստ ֆեյսբուքյան հրապարակումների, բացառապես ՔՊ-ականներ են։ Օրինակ՝ մինչ այս առաջադրվելու մասին հայտարարել են վարչապետ Նիկոլ Փաշինյանը, ԱԺ նախագահ Ալեն Սիմոնյանը, էկոնոմիկայի նախարար Գևորգ Պապոյանը, պատգամավոր Վահագն Ալեքսանյանը և այլ կարկառուն ՔՊ-ականներ, անկուսակցական որևէ մեկը հրապարակավ չի հայտարարել ՔՊ-ին 1,5 մլն դրամ վճարելու գնով պատգամավորի թեկնածու դառնալու մասին։

Քաղաքական վերլուծաբան Բորիս Նավասարդյանի կարծիքով՝ եթե անձը չի անդամակցել կուսակցությանը, բայց ցանկանում է օգտվել կուսակցության հնարավորություններից, պետք է պատրաստ  լինի ներդրում կատարել նախընտրական ծախսերի համար։ Սակայն, ըստ Նավասարդյանի, սա չպետք է վերածվի առևտրի։

Factor TV-ն փորձեց ՔՊ-ից պարզել՝ անկուսակցականներից առաջադրվելու դիմումներ ստացե՞լ են։ Կուսակցության աշխատակազմի ղեկավարը զանգերի չպատասխանեց։

Մանրամասները՝ տեսանյութում։

Նարեկ Կիրակոսյան