Սպանությունների հետ կապված իրավիճակը ՀՀ-ում․ Արփինե Սարգսյանը թվեր է ներկայացնում․ ՏԵՍԱՆՅՈՒԹ

Հանրապետության մակարդակով շարունակում են գերակշիռ մնալ կենցաղային բնույթ ունեցող սպանությունները, և այս դինամիկան պահպանվում է, որևէ էական, կտրուկ և վտանգավոր վերափոխումներ չեն ունենում: Այս մասին ԱԺ մշտական հանձնաժողովների համատեղ նիստին ասել է ՆԳ նախարար Արփինե Սարգսյանը։

Ըստ նախարարի՝ վիճակագրական առումով ևս էական, մեծ թվով շարժ կամ կտրուկ աճի տեմպեր չկան: Սպանությունները ՀՀ-ում հանցավորության ընդհանուր կառուցվածքում կազմում են 0,2 տոկոսը: Սարգսյանն անդրադարձել է նաև ՄԱԿ-ի թմրամիջոցների և հանցավորության դեմ պայքարի գրասենյակի՝ սպանությունների վերաբերյալ համաշխարհային զեկույցներին:

«Ինդեքսը հիմնականում կազմվում է 100 հազար բնակչի հաշվով տեղի ունեցած սպանությունների հաշվարկով, և պիտի փաստեմ, որ 2021-ին ընդհանուր առմամբ միջին համաշխարհային ցուցանիշը 100 հազար բնակչի հաշվով 5,8 դեպք է։ Հայաստանը շարունակում է համաշխարհային միջինից ցածր ցուցանիշներ գրանցել, այսինքն՝ երբ ասում ենք՝ միջինից ցածր ցուցանիշներ, սա դրական արդյունք է, որովհետև, եթե համաշխարհային մակարդակում 100 հազար բնակչի հաշվով միջինում 5,8 սպանության դեպք է արձանագրվում, 2021 թվականին Հայաստանում այս ցուցանիշը եղել է 2, 2022-ին՝ 1,9, 2023-ին՝ 1,8, 2024-ին՝ 2: Ակնհայտորեն կրկնակիից ավելի նվազում ունենք ընդհանուր առմամբ միջին համաշխարհային ցուցանիշից»,- ասել է նախարարը՝ նշելով, որ գնահատականները թարմացվում են 4-5 տարվա կտրվածքով:

Մանրամասները՝ տեսանյութում։

Եվգենյա Համբարձումյան