07.09.2026 | 13:45
Մայր Աթոռը խոսում է Հովհաննավանքի «անհարիր միջոցառման» մասին, Տեր Արամը պնդում է՝ տեսանյութերը կեղծ են
Աֆղանստանը և Պակիստանը նոյեմբերի 6-ին Ստամբուլում կվերսկսեն խաղաղության բանակցությունները, կերկարաձգեն հրադադարի ռեժիմը. Թուրքիայի ԱԳՆ
Քաղաքականություն
31.10.2025 | 12:23
Աֆղանստանը և Պակիստանը համաձայնել են վերսկսել խաղաղության բանակցությունները Ստամբուլում նոյեմբերի 6-ին, իսկ մինչ այդ պահպանել հրադադարը։ Այս մասին հայտարարել է Թուրքիայի արտաքին գործերի նախարարությունը։
«Կողմերը համաձայնել են շարունակել հրադադարը։ Դրա իրականացման եղանակները կքննարկվեն և կորոշվեն Ստամբուլում 2025 թվականի նոյեմբերի 6-ին կայանալիք բարձր մակարդակի հանդիպման ժամանակ»,- ասվում է նախարարության հայտարարության մեջ։
Նշվում է, որ Աֆղանստանի և Պակիստանի միջև Թուրքիայի և Կատարի միջնորդությամբ անցկացված բանակցությունների արդյունքում համաձայնություն է ձեռք բերվել հրադադարի պահպանման վերաբերյալ։ Համատեղ գրավոր հայտարարության համաձայն՝ հոկտեմբերի 25-ից 30-ը Ստամբուլում անցկացվել են հանդիպումներ չորս երկրների մասնակցությամբ՝ հոկտեմբերի 18-19-ին Դոհայում առաջին անգամ համաձայնեցված հրադադարի ռեժիմն ամրապնդելու համար։
Կողմերը նաև համաձայնել են ստեղծել մոնիթորինգի և ստուգման մեխանիզմ՝ խաղաղությունն ապահովելու և ցանկացած խախտող կողմի նկատմամբ պատժամիջոցներ կիրառելու համար։ Հայտարարության մեջ ընդգծվում է, որ Թուրքիան և Կատարը գնահատում են Աֆղանստանի ու Պակիստանի «ակտիվ ներդրումը» գործընթացում և պատրաստ են շարունակել աջակցել երկարատև խաղաղության և կայունության ապահովման ջանքերին։
Վերջերս սահմանային բախումներից հետո Պակիստանը և Աֆղանստանը հոկտեմբերի 15-ին հայտարարել էին 48-ժամյա հրադադարի մասին, որը հետագայում երկարաձգել էր՝ մինչև Դոհայում Թուրքիայի և Կատարի աջակցությամբ կայանալիք բանակցությունների ավարտը։
Թարգմանությունը՝ Էմմա Չոբանյանի
