01.11.2026 | 17:23
Բուլղարիայում մեկնարկել է նախագահական ընտրությունների երկրորդ փուլը
Արգենտինայի նախագահ Միլեյի կուսակցությունը հաղթել է խորհրդարանի միջանկյալ ընտրություններում
Քաղաքականություն
27.10.2025 | 16:16
Արգենտինայի միջանկյալ խորհրդարանական ընտրություններում աջակողմյան La Libertad Avanza դաշինքը, որի մեջ է մտնում Արգենտինայի նախագահ Խավիեր Միլեյի Լիբերտարիանական կուսակցությունը, նշանակալի հաղթանակ է տարել: Կառավարության աշխատակազմի ղեկավար Գիլյերմո Ֆրանկոյի տվյալներով՝ դաշինքը ստացել է ձայների 40,7%-ը քվեաթերթիկների 97%-ի հաշվարկից հետո, գրում է DWի ռուսական ծառայությունը:
Միլեյի կուսակցությունը հաղթանակ է տարել նաև մայրաքաղաք Բուենոս Այրեսում, ինչպես նաև Կորդոբա և Սանտա Ֆե նահանգներում: Բուենոս Այրեսը երկար ժամանակ համարվում էր ուլտրալիբերալների հիմնական մրցակիցների՝ նախկին նախագահ Քրիստինա Ֆերնանդես դե Կիրշների «Հայրենիքի ուժ» կենտրոնամետ կոալիցիայի հենակետը: Միջանկյալ ընտրություններում կոալիցիան ստացել է ձայների 31,6%-ը:
Միջանկյալ ընտրությունները համարվում են Միլեյի առաջին փորձությունը գրեթե երկու տարի առաջ պաշտոնը ստանձնելուց և արմատական խնայողության քաղաքականություն սկսելուց հետո։
«Այսօր մենք հասել ենք շրջադարձային կետի։ Այսօր սկսվում է մեծ Արգենտինայի կառուցումը»,- Բուենոս Այրեսում կայացած նախընտրական միջոցառման ժամանակ իր կողմնակիցներին ասել է նախագահը՝ խոստանալով շարունակել արդեն իսկ իրականացվող խնայողության ծրագիրը «Արգենտինայի պատմության մեջ ամենաբարեփոխական Կոնգրեսի» հետ։
Արգենտինայի միջանկյալ խորհրդարանական ընտրություններում բաշխվել են Պատգամավորների պալատի 257 տեղերի կեսը և Սենատի 72 տեղերի մեկ երրորդը։ Միլեյի կուսակցությունը նախկինում երկու պալատներում էլ փոքրամասնություն էր կազմում։ Ընտրություններից հետո նա հայտարարել է, որ իր կուսակցությունն ավելի քան եռապատկել է իր տեղերի քանակը և այժմ Պատգամավորների պալատում կունենա 101 տեղ՝ նախկին 37-ի փոխարեն, և Սենատում 20 տեղ՝ նախկին 6-ի փոխարեն։
Թարգմանությունը՝ Էմմա Չոբանյանի
