Պուտինը հայտարարել է «Բուրեվեստնիկ» թևավոր հրթիռի ևս մեկ փորձարկման մասին

Ռուսական զինված ուժերը հայտարարել են «Բուրեվեստնիկ» անունը կրող միջուկային հրթիռի փորձարկման մասին։ Ռուսաստանի նախագահ Վլադիմիր Պուտինի խոսքով՝ փորձարկումն անցել է հաջող, և «այդպիսի եզակի զինատեսակ աշխարհում ոչ ոքի մոտ չկա»։

ՌԴ Զինված ուժերի Գլխավոր շտաբի պետ Վալերի Գերասիմովը հայտնել է, որ հոկտեմբերի 22-ին իրականացվել է «Բուրեվեստնիկ» միջուկային հրթիռի փորձարկումը։ Ինչպես նշվում է, հրթիռը մնացել է օդում շուրջ 15 ժամ և հաղթահարել մոտ 14 000 կիլոմետր ճանապարհ։ Գերասիմովը հավելել է, որ «սա դեռ վերջը չէ»։

Ռուսական ՏԱՍՍ գործակալությունը գրում է, որ հրթիռի մշակումը սկսվել է այն բանից հետո, երբ ԱՄՆ-ը 2001թ. դեկտեմբերին դուրս եկավ 1972թ. կնքված հակաբալիստիկ հրթիռների վերաբերյալ պայմանագրից։ ՌԴ պաշտպանության նախարարությունում ընդգծել են. «Նոր ռազմավարական զինատեսակների ստեղծումը ուղղված է երկրի պաշտպանունակության բարձրացմանն ու Ռուսաստանի և նրա դաշնակիցների դեմ ագրեսիայի կանխմանը»։

Ռուսաստանի նախագահ Վլադիմիր Պուտինը պնդում է, որ միջուկային շարժիչով «Բուրեվեստնիկ» թևավոր հրթիռը չունի համարժեք որևէ այլ երկիրում։ Այդ մասին նա ասել է Միավորված խմբավորման զորքերի հրամանատարական կետի այցելության ժամանակ։

«Ինձ ներկայացվել է ոլորտային հաշվետվություն, և Պաշտպանության նախարարության գնահատականները նույնպես հայտնի են։ Ամեն դեպքում, սա եզակի արտադրանք է, որը չունի աշխարհում անալոգ։ Ես շատ լավ հիշում եմ, երբ մենք հայտարարեցինք, որ նման զենք է մշակվում, նույնիսկ ամենաբարձր մակարդակի մասնագետներն էին ասում, որ նպատակը լավն է, արժանի, բայց տեսանելի պատմական հեռանկարում՝ չիրականացվող։ Դա մասնագետների կարծիքն էր, կրկնում եմ՝ ամենաբարձր դասի»,-նշել է նա։

Պենտագոնը, ինչպես փոխանցում է ՏԱՍՍ-ը, ընդունել է, որ «Բուրեվեստնիկ» հրթիռը կարող է հարվածներ հասցնել գրեթե ցանկացած կրիչից՝ «իր բացառիկ հեռահարության և ինքնավարության շնորհիվ»։