Իսրայելի կողմից Արևմտյան ափի բռնակցման քվեարկությունը սպառնում է Գազայում հրադադարին․ Մարկո Ռուբիոն նախազգուշացնում է 

ԱՄՆ պետքարտուղար Մարկո Ռուբիոն հայտարարել է, որ Իսրայելի Քնեսեթի կողմից Արևմտյան ափի բռնակցման ուղղությամբ ձեռնարկված քայլը կսպառնա նախագահ Դոնալդ Թրամփի՝ Գազայում հակամարտությունը դադարեցնելու ծրագրին, որը մինչ օրս հանգեցրել է անկայուն հրադադարի, գրում է France 24-ը։

«Այո, դա քվեարկություն է Քնեսեթում։ Բայց կարծում եմ՝ նախագահը հստակեցրել է, որ մենք այս պահին դրան չենք աջակցի, և մենք կարծում ենք, որ դա պոտենցիալ սպառնում է խաղաղության համաձայնագրին»,- լրագրողներին ասել է Ռուբիոն Իսրայել մեկնելուց առաջ։

Ռուբիոյի այցը Իսրայել, որի մասին չորեքշաբթի հայտարարել էր Պետքարտուղարությունը, վերջինն է ԱՄՆ բարձրաստիճան պաշտոնյայի կողմից, որը ձգտում է պահպանել Իսրայելի և պաղեստինյան «ՀԱՄԱՍ» զինյալ խմբավորման միջև փխրուն զինադադարը։

ԱՄՆ փոխնախագահ Ջեյ Դի Վենսը նույնպես այս շաբաթ ժամանել է Իսրայել և հանդիպել Իսրայելի վարչապետ Բենիամին Նեթանյահուի հետ։ Նախաըտեսվում է նաև նրա հանդիպումը պաշտպանության նախարար Իսրայել Կացի և ռազմավարական հարցերով նախարար Ռոն Դերմերի հետ։

Պետքարտուղարությունը հայտարարել է, որ Ռուբիոն այցելում է Իսրայել՝ աջակցելու Թրամփի՝ Գազայի պատերազմը դադարեցնելու 20 կետանոց ծրագրի իրականացմանը։

Իսրայելի օրենսդրությունն օկուպացված Արևմտյան ափին կիրառելու մասին օրինագիծը, որը համարժեք է պաղեստինցիների կողմից որպես իրենց սեփական պետություն պահանջվող հողերի բռնակմանը, չորեքշաբթի նախնական հավանություն է ստացել Իսրայելի խորհրդարանի կողմից։ Շուրջ 700,000 իսրայելցիներ ապրում են Իսրայելի կողմից օկուպացված Արևմտյան ափի բնակավայրերում։ ՄԱԿ-ը և միջազգային հանրության մեծ մասն այս բնակավայրերը համարում են անօրինական՝ միջազգային իրավունքի համաձայն։

Այնուամենայնիվ, Իսրայելի կառավարությունը հղում է կատարում Արևմտյան ափի հետ աստվածաշնչյան և պատմական կապերին՝ այն տարածքին, որը նա համարում է վիճելի, և դեմ է Պաղեստին պետության ստեղծմանը։

Այս քվեարկությունն օրենքն ընդունելու համար անհրաժեշտ չորս քվեարկություններից առաջինն է և համընկել է Վենսի՝ Իսրայել այցի հետ ու տեղի ունեցել Թրամփի հայտարարությունից մեկ ամիս անց, որ թույլ չի տա Իսրայելին բռնակցել Արևմտյան ափը։

Նեթանյահուի «Լիքուդ» կուսակցությունը մերժել է իշխող կոալիցիայից դուրս գտնվող պատգամավորների կողմից առաջարկված օրինագիծը, որն ընդունվել է 120 օրենսդիրներից 25 կողմ և 24 դեմ ձայների հարաբերակցությամբ։ Ընդդիմադիր կուսակցության կողմից առաջարկվող երկրորդ օրինագիծը, որն առաջարկում էր Երուսաղեմի մոտ գտնվող Մաալե Ադումիմ բնակավայրի բռնակցումը, ընդունվել է ձայների 31 կողմ և 9 դեմ հարաբերակցությամբ։

Նեթանյահուի կառավարությունը քննարկում էր բռնակցումը որպես պատասխան իր արևմտյան դաշնակիցների կողմից սեպտեմբերին Պաղեստինի պետության ճանաչմանը, սակայն, կարծես, հրաժարվել է  այդ քայլից, երբ Թրամփը առարկել էր։

Բնակավայրերի շինարարությունն արագորեն ընդլայնվում է 2022 թվականից ի վեր, ինչ Նեթանյահուի կառավարությունը իշխանության է եկել։

Թարգմանությունը՝ Էմմա Չոբանյանի