Քաղաքականություն
21.10.2025 | 12:42
ԱՄՆ Սենատը չի քննարկի Ռուսաստանի դեմ նոր պատժամիջոցների օրինագիծը՝ մինչև նախագահ Դոնալդ Թրամփի և նրա ռուս գործընկեր Վլադիմիր Պուտինի հանդիպումը Բուդապեշտում: Այս մասին հայտնել է Bloomberg-ը՝ հղում անելով Սենատի մեծամասնության առաջնորդ Ջոն Թունին, փոխանցում է DW-ի ռուսական ծառայությունը։
«Մենք այս պահին դադար ենք վերցնում»,- ասել է սենատորը։
Նոր օրինագծի համաձայն՝ ԱՄՆ նախագահը կարող է մինչև 500% մաքսատուրքեր սահմանել այն երկրներից ներմուծվող ապրանքների վրա, որոնք ռուսական էներգակիրներ են գնում և ակտիվորեն չեն աջակցում Ուկրաինային: Bloomberg-ը նշում է, որ նոր սահմանափակումներին կարող են ենթարկվել նաև Չինաստանը և Հնդկաստանը։
Անցյալ շաբաթ Թունը հայտարարել էր, որ ԱՄՆ Սենատը մտադիր է քվեարկել օրինագծի հարցով 30 օրվա ընթացքում: Այն մի քանի ամիս է՝ անորոշ կարգավիճակում է՝ չնայած 100 սենատորներից առնվազն 85-ի աջակցությանը:
Սեպտեմբերի սկզբին ԱՄՆ ֆինանսների նախարար Սքոթ Բեսենթը հայտարարել էր, որ Ռուսաստանի դեմ հետագա պատժամիջոցների համար «բոլոր տարբերակները սեղանին են», քանի որ Մոսկվան շարունակում է հարձակումները Ուկրաինայի վրա Անքորիջի գագաթնաժողովից հետո։
Ավելի վաղ Դոնալդ Թրամփը բազմիցս սպառնացել է պատժամիջոցներ կիրառել Ռուսաստանի դեմ, եթե այն խաղաղություն չհաստատի Ուկրաինայում։ Միևնույն ժամանակ, Թրամփը մեղադրել է եվրոպացի առաջնորդներին Ուկրաինայում «պատերազմը ֆինանսավորելու» մեջ՝ ռուսական նավթ գնելու միջոցով, և կոչ արել նրանց կտրել Մոսկվային եկամտի այս աղբյուրից և ճնշում գործադրել Չինաստանի վրա այս հարցում։
Թարգմանությունը՝ Էմմա Չոբանյանի
