Պատերազմում 5000 զոհ տված երկրի ղեկավարի ձվածեղ եփելը, սրտիկ անելը չեմ հասկանում․ գիշերը չպիտի քնի՝ քանի 23 պատանդ կա․ Մանե Թանդիլյան. ՏԵՍԱՆՅՈՒԹ

Օրերս Բաքվի դատարանը հայերի դեմ գործի քննության շրջանակում «փաստաթղթեր» են հրապարակել պատերազմին ՀՀ-ի կողմից իբր վարձկաններ ներգրավելու վերաբերյալ։ Նշվել է, թե դա, իբր, կատարվել է կառավարության ու սփյուռքի կազմակերպությունների կողմից։ Ռուբեն Վարդանյանին 10-յակից ավելի հոդվածներով են մեղադրանքներ առաջադրվել։ Վերջին նիստերից մեկում Ռուբեն Վարդանյանը պահանջել էր դատարանից հարցաքննել Նիկոլ Փաշինյանին, ԵԱՀԿ Մինսկի խմբի անդամներին, Ադրբեջանում Կարմիր Խաչի կոմիտեի ներկայացուցիչներին, սակայն դիմումը մերժվել է այն հիմնավորմամբ, որ հարցաքննության ենթակա չեն, քանի որ կապ չունեն մեղադրանքի հետ։

«Ապրելու երկիր» կուսակցության համահիմնադիր Մանե Թանդիլյանը  Factor TV-ի հետ զրույցում վստահություն է հայտնում, որ անհրաժեշտ է հիմք չընդունել և կասկածով վերաբերվել Բաքվի լրատվամիջոցների հաղորդած տեղեկություններին՝ այս դատավարություն կոչված երևույթների հանդեպ։ Ըստ նրա՝ Ադրբեջանի նպատակը «հիմնավորումներ գտնելն է, թե իբր Հայաստանը օկուպանտ երկիր է»։ Թանդիլյանը դժգոհ է պարոն Վարդանյանին և մյուս գերիներին վերադարձնելու իշխանության ջանքերից․ «Չեմ հավատում, որ Փաշինյանը Թրամփին խնդրել է Ռուբեն Վարդանյանին վերադարձնել Բաքվից, քանի որ նրանց վերադարձով շահագրգիռ չէ։ Փաշինյանը Ռուբեն Վարդանյանի դեմ ցուցմունքներ է փորձում տալ, նա շահառու է, որ Վարդանյանը պահվի Բաքվի բանտում։ Գերիները վերադարձի շանս կա իշխանափոխության դեպքում։ Ադրբեջանը մեր դեմ պատերազմ է վարում, քանի դեռ վերջին գերին չի վերադարձվել Հայաստան»,- ասաց Մանե Թանդիլյանը։

Մանե Թանդիլյանը չի թաքցրել Ռուբեն Վարդանյանի կապը «Ապրելու երկիր» կուսակցության հետ։ Այս ուժը չի դադարեցրել կուսակցության գործունեությունը՝ չնայած Վարդանյանը գերեվարված է։ Իսկ ո՞րն է «Ապրելու երկիր» կուսակցության և ԱԺ ընդդիմության միջև տարբերությունը․ «Ակնհայտ է մեր և ԱԺ ընդդիմության տարբերությունը, այս իշխանությունը հետևանք է նախորդների կոռուպցիայի, սխալ կառավարման»,- արձագանքում է Թանդիլյանը։

Հարցազրույցն ամբողջությամբ՝ տեսանյութում։

Ռոբերտ Անանյան