Թրամփի ելույթը Իսրայելի խորհրդարանում ընդհատվել է պատգամավորների բողոքի ակցիայով․ ՏԵՍԱՆՅՈՒԹ

ԱՄՆ նախագահ Դոնալդ Թրամփը Երուսաղեմում Իսրայելի խորհրդարանում (Կնեսետ) անդամների ծափահարությունների ներքո ելույթ է ունեցել, փոխանցում է BBC-ի ռուսական ծառայությունը։

«Սա գեղեցիկ վայր է, շատ գեղեցիկ վայր։ Մենք հավաքվել ենք խորը ուրախության և աճող հույսի օրը։ Երկու ցավալի տարիներ տևած խավարից և գերությունից հետո 20 քաջարի պատանդներ վերադառնում են իրենց սիրելիների գիրկը։ Եվս 28 թանկարժեք սիրելիներ վերադառնում են՝ վերջապես հավերժ հանգստանալու սուրբ երկրում»,- ասել է Դոնալդ Թրամփը։

Նա շնորհակալություն է հայտնել իր հատուկ բանագնաց Սթիվ Ուիթկոֆին՝ ասելով, որ բոլորը նրան այնքան են սիրում, որ նա կարող է հաղթահարել մյուս պատերազմը, որը փորձում է կանգնեցնել՝ Ռուսաստանի պատերազմը Ուկրաինայի հետ։

Թրամփի ելույթը կարճ ժամանակով ընդհատվել է ցուցարարներով բղավոցներով, սակայն անվտանգության աշխատակիցները նրանց դուրս են բերել դահլիճից։ Պարզվել է՝ Թրամփի ելույթն ընդհատել են Կնեսետի պատգամավորներ Օֆեր Կասիֆը և Այման Օդեիհը։ Ընդդիմադիր պատգամավորներից մեկը պաստառ է պարզել՝ «Ճանաչե՛ք Պաղեստինը» գրությամբ։

Խորհրդարանի խոսնակ Ամիր Օհանան կարգի է հրավիրել պատգամավորներին՝ բողոքող պատգամավորներին բարձր ծափահարությունների ներքո դուրս են բերել դահլիճից։

ԱՄՆ նախագահն Իսրայելի և ՀԱՄԱՍ-ի  միջև վերջերս Գազայի վերաբերյալ կնքված համաձայնագիրը «ժամանակին» է  անվանել, քանի որ Իսրայելի ռազմական գործողությունները դառնում էին «դաժան և լարված»։

Թրամփը նաև հայտարարել է՝ հիմա պաղեստինցի ժողովուրդը պետք է որոշի՝ հրաժարվել «ահաբեկչությունից և բռնությունից»։

Թարգմանությունը՝ Էմմա Չոբանյանի