ՀՀ ՇՄ նախարարը հանդիպել է ԱՄԷ շրջակա միջավայրի նախարարի հետ

Բնության պահպանության միջազգային միության (IUCN) Բնապահպանության համաշխարհային կոնգրեսին մասնակցելու նպատակով աշխատանքային այցով Արաբական Միացյալ Էմիրություններում գտնվող ՀՀ շրջակա միջավայրի նախարար Համբարձում Մաթևոսյանը հանդիպել է ԱՄԷ շրջակա միջավայրի և կլիմայական փոփոխությունների նախարար տիկին Ամնա ալ Շամսիի հետ։ Այս մասին նախարարը տեղեկացրել է ֆեյսբուքյան իր էջում:

«Քննարկեցինք 2026 թվականին Հայաստանում կայանալիք Կենսաբազմազանության մասին կոնվենցիայի 17-րդ կողմերի համաժողովի (COP17) նախապատրաստական աշխատանքները։ Զրույցի առանցքում էր Կունմին-Մոնրեալի գլոբալ կենսաբազմազանության շրջանակը (Kunming-Montreal Global Biodiversity Framework)։

Քանի որ Արաբական Միացյալ Էմիրությունները հաջողությամբ հյուրընկալել են COP28 համաժողովը, կարևոր համարեցի նրանց փորձի ուսումնասիրությունն ու կիրառումը Հայաստանում սպասվող COP17-ի կազմակերպչական գործընթացներում։

Մենք վճռական ենք COP17-ը կազմակերպել բարձր մակարդակով՝ համախմբելով միջազգային փորձը, առաջատար գիտական մոտեցումները և նորարարական լուծումները՝ նպաստելով գլոբալ կենսաբազմազանության պահպանությանն ու շրջակա միջավայրի կայուն կառավարմանը։

Բացի այդ, Հայաստանի Հանրապետության Շրջակա միջավայրի նախարարությունն ու ԱՄԷ-ի Կլիմայի փոփոխության և շրջակա միջավայրի նախարարությունը արդեն իսկ ունեն հուշագիր համագործակցության մասին, որի շրջանակում իրականացվում են մի շարք նախաձեռնություններ` ուղղված՝

• Կլիմայի փոփոխության դեմ պայքարին,
• Կենսաբազմազանության պահպանությանը,
• Շրջակա միջավայրի մոնիթորինգի և ազդեցության գնահատման համակարգերի կատարելագործմանը,
• Վտանգավոր նյութերի և թափոնների կառավարմանը,
• Բնական ռեսուրսների կայուն օգտագործմանը,
• Էկոտուրիզմի զարգացմանը»,- ասվում է գրառման մեջ:

Ըստ աղբուրի՝ կողմերը համաձայնել են շարունակել համագործակցությունը՝ նպաստելով երկու երկրների միջև բնապահպանական ոլորտի փորձի փոխանակմանն ու համատեղ նախաձեռնությունների իրագործմանը։