Էրդողանը պնդում է, թե Թրամփը խնդրել է Թուրքիային՝ համոզել ՀԱՄԱՍ-ին ընդունել Գազայում խաղաղության ծրագրին

ԱՄՆ նախագահ Դոնալդ Թրամփը խնդրել է Թուրքիային «համոզել» ՀԱՄԱՍ-ին՝ ընդունել Գազայի պատերազմը դադարեցնելու իր ծրագիրը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Turkish Minute-ը:

Նրա խոսքերը հնչում են այն ժամանակ, երբ Իսրայելի և ՀԱՄԱՍ-ի բանակցողները պետք է Եգիպտոսի Շարմ էլ Շեյխ հանգստավայրում անուղղակի բանակցությունների երրորդ օրն անցկացնեն՝ ուղղված Գազայի երկամյա պատերազմի դադարեցմանը, Կատարի, Թուրքիայի և ԱՄՆ-ի բարձրաստիճան պաշտոնյաների հետ միասին։

«Ե՛վ Միացյալ Նահանգներ մեր այցի ժամանակ, և՛ մեր վերջին հեռախոսազրույցի ժամանակ մենք պարոն Թրամփին բացատրեցինք, թե ինչպես կարելի է լուծում գտնել Պաղեստինում։ Նա հատուկ խնդրել է, որ մենք հանդիպենք ՀԱՄԱՍ-ի հետ և համոզենք նրանց»,- Ադրբեջանից Թուրքիա վերադառնալիս ինքնաթիռում լրագրողներին ասել է Էրդողանը։

ՀԱՄԱՍ-ի հետ սերտ կապեր ունեցող Թուրքիայի առաջնորդը հաճախ է մեղադրել Իսրայելին Գազայում «ցեղասպանության» մեջ, մեղադրանք, որը Իսրայելը բազմիցս հերքում է։

Անուղղակի բանակցությունները հիմնված են Թրամփի կողմից անցյալ ամիս առաջարկված 20 կետանոց ծրագրի վրա, որին չորեքշաբթի միանալու է Թուրքիայի հետախուզության ղեկավար Իբրահիմ Քալընի գլխավորած թուրքական պատվիրակությունը։

«ՀԱՄԱՍ-ը պատասխանել է՝ մեզ ասելով, որ պատրաստ է խաղաղության և բանակցությունների: Այլ կերպ ասած՝ այն հակառակ դիրքորոշում չի ընդունել: Ես սա համարում եմ շատ արժեքավոր քայլ: ՀԱՄԱՍ-ը Իսրայելից առաջ է։ Մեր գործընկերները հիմա Շարմ էլ Շեյխում են։ Մենք այս գործընթացի ընթացքում միշտ կապի մեջ ենք եղել ՀԱՄԱՍ-ի  հետ: Մենք դեռևս կապի մեջ ենք։ Մենք բացատրում ենք, թե որն է ամենաողջամիտ ուղին և ինչ պետք է արվի, որպեսզի Պաղեստինը վստահորեն առաջ շարժվի դեպի ապագա»,- նշել է Էրդողանը։

Թարգմանությունը՝ Էմմա Չոբանյանի