Ծաղկաման՝ Չինաստանի, ձեռագործ անոթ՝ Իրանի նախագահներից․ Փաշինյանը թանկարժեք նվերներ է ստացել 

Վարչապետ Նիկոլ Փաշինյանը օտարերկրյա գործընկերներից թանկարժեք նվերներ է ստացել։ Factor.am-ն այս մասին տեղեկանում է Փաշինյանի՝ Կոռուպցիայի կանխարգելման հանձնաժողով ներկայացրած նվերների հաշվառման ձևաթղթից։ Չինաստանի նախագահ Ծինփին Սին Փաշինյանին երկու իր է նվիրել Թինծին քաղաքում օգոստոսի 31-ին տեղի ունեցած հանդիպման ժամանակ։ Չինացի գործընկերը ՀՀ վարչապետին «Խաղաղություն և ներդաշնակություն» անունը կրող ծաղկաման է նվիրել՝ պատրաստված կլուազոնե էմալով (հին զարդանախշով տեխնիկա) և փայտի ու մետաղի փորագրության տեխնիկայով։ Նվերի արժեքը գնահատվել է 370,550 դրամ։ 

Չինաստանի նախագահը Փաշինյանին «Միասին խաղաղության համար» վերնագիրը կրող էմալապատ անոթ՝ զուն է նվիրել: Այն հին չինական ավանդական գինու անոթ է, որը կրկին պատրաստված է կլուազոնե և փորագրության տեխնիկայով: Նշվում է, որ զունը կարմիր և ոսկեգույն է, չափսերը՝ 355մմ x 253մմ x 485 մմ: Նվերի արժեքը գնահատվել է 403,820 դրամ։

Նիկոլ Փաշինյանը նվեր է ստացել նաև Իրանի նախագահ Մասուդ Փեզեշքիանից օգոստոսի 19-ին իրանցի գործընկերոջ Հայաստան կատարած պաշտոնական այցի շրջանակում։ Նա Փաշինյանին Իրանի Սպահան քաղաքում ծագած նոր և զարգացող «Մես-Պարդազ» տեխնիկայով պատրաստված քաղցրավենիքի ձեռագործ անոթ է նվիրել: Նշվում է, որ դրա բարձրությունը 45 սմ է, նյութը՝ պղինձ: Նվերի արժեքը ստացողի կողմից գնահատվել է 347,494 դրամ։ 

Հիշեցնենք, որ «Հանրային ծառայության մասին» օրենքում կատարված փոփոխություններով սահմանվել են հանրային ծառայողների կողմից նվերներ ընդունելու վերաբերյալ նոր կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:

Անի Թամրազյան