30.07.2026 | 11:47
Լեհաստանը ռազմական ինքնաթիռներ է օդ բարձրացրել Ուկրաինայի վրա ռուսական զանգվածային հարձակման ֆոնին
Զերծ մնալ հուշարձաններին ու պատմական միջավայրին վնաս հասցնելու գործողություններից. հայտարարություն
06.10.2025 | 21:14
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը անդրադարձել է հուշարձանների, եկեղեցիների տարածքում վանդալիզմի դեպքերին՝ հորդորելով զերծ մնալ հուշարձաններին ու պատմական միջավայրին վնաս հասցնելու գործողություններից։
«Վերջին շրջանում մեր հանրապետության տարբեր մարզերում գտնվող պատմամշակութային հուշարձանների, եկեղեցիների տարածքում ցավալիորեն հաճախակի են դարձել վանդալիզմի դեպքերը: Վնասում կամ ոչնչացնում են հուշարձաններին վերաբերող տեղեկատվական վահանակները, եկեղեցիների պատերին փորագրելով կամ ներկելով թողնում անհասկանալի գրառումներ՝ խաթարելով հուշարձանի տեսքն ու վնաս հասցնելով հուշարձանին: Սրանք հուշարձանների տարածքում իրականացվող ապօրինություններ են, իրավախախտումներ, որոնք դատապարտելի են:
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի մարզային ծառայությունների աշխատակիցները պարբերաբար շրջայցեր են կատարում, մոնիտորինգ իրականացնում, արձանագրում վանդալիզմի դեպքերը, բացատրական ու իրազեկման աշխատանքներ իրականացնում: Ցավոք, դրանք ոչ միշտ են ցանկալի արդյունք տալիս:
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը հերթական անգամ հորդորում է զերծ մնալ հուշարձաններին ու պատմական միջավայրին վնաս հասցնելու գործողություններից: Դրանք հարիր չեն մեր մշակույթին ու ազգային արժեհամակարգին»,- ասված է հայտարարությունում:
