05.12.2025 | 13:08
ՄԹ պաշտպանության հարցերով պետնախարարի գլխավորած պատվիրակությունն այցելել է Հայոց ցեղասպանության հուշահամալիր
Վրաստանի դատախազությունը սահմանադրական կարգի և իշխանության բռնի տապալման կոչերի համար մեղադրանք է առաջադրել 5 ընդդիմադիր գործչի
Քաղաքականություն
06.10.2025 | 13:58
Վրաստանի դատախազությունը մեղադրանք է առաջադրել հոկտեմբերի 4-ի հանրահավաքի կազմակերպչական կոմիտեի հինգ անդամների՝ Պաատա Բուրչուլաձեին, Մուրթազ Զոդելավային, Իրակլի Նադիրաձեին, Պաատա Մանջգալաձեին և Լաշա Բերիձեին: Բոլորը մեղադրվում են խմբակային բռնություն կազմակերպելու և ղեկավարելու, ռազմավարական և կարևորագույն օբյեկտ գրավելու փորձ կատարելու, ինչպես նաև Վրաստանի սահմանադրական կարգը և պետական իշխանությունը բռնի կերպով տապալելու կոչ անելու մեջ, գրում է Эхо Кавказа-ն։
«Նադիրաձեն, Բուրչուլաձեն և Զոդելավան կոչ են արել հանրությանը «հեղափոխություն» իրականացնել, որին մասնակցելու էին ագրեսիվ տրամադրված քաղաքացիներ։ Նրանք պետք է համատեղ տապալեին կառավարությունը, և որպեսզի այդ գործողություններն արդյունավետ լինեին, անհրաժեշտ էր հասարակության որոշակի խմբերի զանգվածային ներգրավվածությունը։ Հետաքննությունը նաև պարզել է, որ տեղական ինքնակառավարման մարմինների ընտրությունների օրը՝ հոկտեմբերի 4-ին, Պաատա Բուրչուլաձեն, Մուրթազ Զոդելավան, Իրակլի Նադիրաձեն, Լաշա Բերիձեն, Պաատա Մանջգալաձեն և ուրիշներ որոշել են կազմակերպել բռնի խմբային գործողություններ և լրատվամիջոցների միջոցով հրապարակավ հայտարարել են, որ կազմակերպելու և ղեկավարելու են այդ գործողությունները»,- հայտարարել է դատախազությունը։
Նշվում է, թե այդ օրը Ազատության հրապարակում Պաատա Բուրչուլաձեն ամբոխին ներկայացրել է գործողությունների ծրագիր, «ըստ որի՝ խմբային բռնության մասնակիցները պետք է անհապաղ ձերբակալեին առանձին պետական պաշտոնյաների և կիրառեին տարբեր անօրինական միջոցներ իրենց համար անցանկալի համարվող անձանց նկատմամբ»։ Այնուհետև Մուրթազ Զոդելավան «կոչ է արել ցուցարարներին շարասյուն կազմել դեպի Վրաստանի նախագահի աշխատակազմի շենք, որը համարվում է ռազմավարական և հատկապես կարևոր օբյեկտ, և ուժով գրավել այն»։
Մեղադրանքում նշվում է, որ «խմբային բռնության մասնակիցները դիտավորյալ ոչնչացրել են քաղաքային և մասնավոր սեփականությունը՝ օգտագործելով ծանր առարկաներ և հրկիզումներ», և «վիրավորել ու հարձակվել են իրավապահ մարմինների աշխատակիցների վրա՝ նրանց վրա քարեր և այլ ծանր առարկաներ նետելով»։
Մուրթազ Զոդելավան, Պաատա Բուրչուլաձեն և Իրակլի Նադիրաձեն մեղադրվում են Քրեական օրենսգրքի 222-րդ (ռազմավարական կամ հատուկ նշանակության օբյեկտների խմբային զավթման կամ շրջափակման փորձ), 225-րդ (խմբային բռնության կազմակերպում, ղեկավարում կամ մասնակցություն) և 317-րդ (Վրաստանի սահմանադրական կարգի բռնի փոփոխության կամ պետական իշխանության տապալման կոչեր) հոդվածներով։ Առավելագույն պատիժ է նախատեսվում մինչև 9 տարի ժամկետով ազատազրկումը։
Հավելենք, որ հոկտեմբերի 4-ին՝ տեղական ինքնակառավարման մարմինների ընտրությունների օրը, Թբիլիսիում զանգվածային բողոքի ցույց էր տեղի ունեցել։ Ցուցարարներից մի քանիսը ճեղքել էին նախագահական վարչակազմի շենքը շրջապատող ցանկապատը և փորձել մտնել պալատ։ Ոստիկանությունը ձերբակալել է հանրահավաքի կազմակերպչական կոմիտեի բոլոր հինգ անդամներին։ Իշխանությունները նաև հայտարարել են այլ ցուցարարների ձերբակալության մասին։
Թարգմանությունը՝ Էմմա Չոբանյանի
