16.02.2026 | 18:28
ՀՔԱՎ-ը կբողոքարկի Վ․ Սոլովյովի հայտարարությունների վերաբերյալ քրեական վարույթ չնախաձեռնելու որոշումը
Լեհաստանը կործանիչներ է բարձրացրել Լվովի վրա ՌԴ-ի ավիահարվածի ժամանակ
Քաղաքականություն
05.10.2025 | 11:14
Լեհաստանը կործանիչներ է օդ բարձրացրել՝ ՌԴ-ի կողմից Լեհաստանի սահմանին մոտ գտնվող Լվով քաղաքի վրա իրականացված զանգվածային ավիահարվածի ընթացքում, փոխանցում է DW-ն։
«Լեհական և դաշնակիցների ավիացիան ինտենսիվ աշխատում է մեր օդային տարածքում, իսկ հակաօդային պաշտպանության և ռադիոլոկացիոն հսկման ցամաքային համակարգերը բերվել են բարձր պատրաստվածության վիճակի»,-հոկտեմբերի 5-ի առավոտյան հայտնել է Լեհաստանի զինված ուժերի Օպերատիվ հրամանատարությունը։
Հայտարարության մեջ նշվում է, որ այս միջոցները կանխարգելիչ բնույթ ունեն և «ուղղված են օդային տարածքի անվտանգությանն ու քաղաքացիների պաշտպանությանը, հատկապես այն տարածքներում, որոնք սահմանակից են հարձակման ենթարկված շրջաններին»։
Լեհաստանը մի քանի անգամ կործանիչներ է բարձրացրել ռուսական հարվածների ժամանակ, երբ վերջիններս թիրախավորում էին Ուկրաինայի արևմտյան շրջանները։ Մասնավորապես՝ նման միջադեպեր տեղի էին ունեցել սեպտեմբերի 13-ին և 28-ին։
Անցած գիշեր Ռուսաստանը հարվածներ է հասցրել Ուկրաինայի մի շարք շրջանների վրա՝ ներառյալ Զապորոժժեն, Կիևը, ինչպես նաև Լվովի, Օդեսայի և Իվանո-Ֆրանկովսկի մարզերը։ Սկզբում Լվովը ենթարկվել է անօդաչու սարքերի հարձակման, իսկ ընդամենը մեկ ժամ անց քաղաքը ենթարկվել է հրթիռային հարվածի։
Լվովի քաղաքապետ Անդրեյ Սադովին հայտնել է, որ ռուսական հարձակման հետևանքով քաղաքի մի հատված մնացել է առանց էլեկտրականության։
«Թշնամու զանգվածային հարձակման պատճառով Լվովում հանրային տրանսպորտը ժամանակավորապես դադարեցրել է աշխատանքը։ Խնդրում եմ քաղաքացիներին մնալ ապահով վայրերում։ Այս պահին փողոց դուրս գալը վտանգավոր է»,-նախազգուշացրել է նա հոկտեմբերի 5-ի առավոտյան։
Քաղաքապետը նաև հայտնել է, որ ռուսական հարվածների թիրախ է դարձել Sparrow արդյունաբերական պարկը, որի տարածքում հրդեհ է բռնկվել։ Հայտարարության մեջ հատուկ ընդգծվում է, որ պարկի տարածքում ռազմական որևէ թիրախ չի եղել։
