05.06.2026 | 12:35
«Միասնության թևեր»-ի նախընտրական քարոզարշավը Գեղարքունիքում․ ՈՒՂԻՂ
Աշակերտները ցատկել են դպրոցի 2-րդ հարկից․ նրանցից մեկը ողնաշարի վնասվածք է ստացել․ ՏԵՍԱՆՅՈՒԹ
Հասարակություն
02.10.2025 | 20:30
Կոստան Զարյանի անվան թիվ 117 հիմնական դպրոցի 9-րդ դասարանի մի քանի աշակերտներ պատուհանից դուրս են ցատկել։
«Որոշ երեխաներ ցանկացել են դասի չնստել և փախել են, առաջին հարկ իջել, ցանկացել են մուտքից դուրս գալ, սակայն պահակը թույլ չի տվել․ բարձրացել են 2-րդ հարկ, թռել են»,- պատմեց Կոստան Զարյանի անվան թիվ 117 հիմնական դպրոցի տնօրեն Թերեզա Ավագյանը։
Երկրորդ հարկից 7 աշակերտ է ցատկել՝ հինգ տղա և երկու աղջիկ։ Աշակերտներից մեկն այժմ հիվանդանոցում է։ 9ա դասարանի դասղեկը պատմում է՝ դեպքը վերջին դասաժամին է տեղի ունեցել, տարրական դասարանների մասնաշենքից հիմնական մասնաշենք գնալիս պահակն է իրեն ասել, որ իր դասարանի աշակերտներն ուզել են փախչել։
«Միանգամից վազքով բարձրացա դասարան, նկատեցի՝ 7 աշակերտ չկա, զանգեցի բոլոր 7 աշակերտներին, իմացա՝ որտեղ են, ասացի՝ ինչո՞ւ եք նման քայլի գնացել, ասացին՝ հավես չունեինք դաս անելու»,- մանրամասնում է դասղեկ Լուսինե Ջանիկյանը։
Ժամը 18։00-ի սահմաններում աշակերտներից մեկի ծնողն է զանգահարել և ասել, որ երեխային հիվանդանոց են տեղափոխել։ Shamshyan.com-ը գրել էր, որ ուսուցիչը մինչ այդ հրաժարվել է դաս անցկացնել ու հեռացել է դասասենյակից։ Հիվանդանոց տեղափոխված աշակերտի հայրը մեզ պատմեց, որ ըստ երեխայի՝ ուսուցչուհին բարկացել, դասասենյակից դուրս է եկել, իրենք էլ ամբողջ դասարանով որոշել են փախչել։ Գուցե երեխան վախից է այդպես պատմում՝ բացատրում է աղջկա հայրը։
Դպրոցի տնօրենը հերքեց դա, վստահեցրեց՝ ուսուցիչը դասարանում է եղել։
«34 հոգանոց դասարան է, մյուս բոլոր երեխաները դաս են արել»,- հավելում է Ավագյանը։
Դիտարկմանը, որ փաստորեն դպրոցն այնքան էլ անվտանգ չէ, տնօրենն արձագանքեց․ «Առաջին հարկում ճաղավանդակներ կան, բայց, ցավոք, երկրորդ հարկում չկան։ Երբ այդ դեպքը պատահել է, ոստիկանություն է եկել դպրոց, ցուցմունք է վերցրել բոլոր երեխաներից, և ոչ մի բողոք ծնողի կողմից չկա, որովհետև իրենց բալիկն է մեղավոր»,- պարզաբանում է դպրոցի տնօրենը։
15-ամյա երեխան չորեքշաբթի պետք է վիրահատվի, կյանքին վտանգ չի սպառնում՝ փոխանցեց հայրը։
Թիվ 117 հիմնական դպրոցի տնօրենի խոսքով՝ աշակերտները նկատողություն են ստացել։ Քննչական կոմիտեից հետաքրքրվեցինք՝ դեպքի առթիվ վարույթ նախաձեռնվե՞լ է․ իրավապահ կառույցի խոսնակն ասաց, որ դեռևս նյութեր չեն ստացել։
Մանրամասները՝ տեսանյութում։
Արփի Հակոբյան
