Թուրքիան հետաքննություն է սկսել Գազա օգնություն տանող նավատորմի վրա Իսրայելի հարձակման ժամանակ իր քաղաքացիների ձերբակալության գործով

Ստամբուլի գլխավոր դատախազությունը հայտարարել է, որ հետաքննություն է սկսել Իսրայելի կողմից միջազգային ջրերում «Գլոբալ Սումուդ» նավատորմի վրա հարձակման ժամանակ Թուրքիայի քաղաքացիների ձերբակալման վերաբերյալ, գրում է Turkiye today-ը։

Դատախազությունը նշել է, որ Իսրայելի ռազմածովային ուժերի կողմից Գազա ուղևորվող օգնության նավատորմի կալանումից հետո ձերբակալվածների թվում 24 թուրք կա։ Հետաքննությունը հիմնված է Ծովային իրավունքի մասին ՄԱԿ-ի կոնվենցիայի, Թուրքիայի քրեական դատավարության օրենսգրքի 15-րդ հոդվածի և Թուրքիայի քրեական օրենսգրքի 12-րդ և 13-րդ հոդվածների վրա։ Հնարավոր մեղադրանքների թվում են՝ «ազատությունից զրկելը», «տրանսպորտային միջոցների առևանգումը կամ բռնագրավումը», «ծանրացված կողոպուտը», «գույքին վնաս հասցնելը» և «խոշտանգումները»։

Անկարայի գլխավոր դատախազությունը նույնպես հետաքննություն է սկսել «Գլոբալ Սումուդ» նավի վրա կատարված հարձակման վերաբերյալ, որի մեջ եղել են Թուրքիայի քաղաքացիներ։ Հետաքննություն է սկսվել Թուրքիայի քրեական օրենսգրքի 13-րդ հոդվածի համաձայն, որը սահմանում է, որ թուրքական օրենքներն ու դատարաններն իրավասություն ունեն նույնիսկ օտարերկրյա պետությունում օտարերկրացու կողմից կատարված միջազգային հանցագործությունների դեպքերում։

Միևնույն ժամանակ, չորեքշաբթի երեկոյան Թուրքիայի արտաքին գործերի նախարարությունը դատապարտել է Իսրայելի կողմից նավատորմի դեմ կատարված «ահաբեկչական գործողությունը» և «հույս է հայտնել, որ այս հարձակումը չի վտանգի Գազայի հատվածում հրադադարի հասնելու ջանքերը»։

Թարմացված տեղեկություններով՝ Իսրայելի ռազմածովային ուժերը ձերբակալել են 37 թուրք ակտիվիստի, որոնք գտնվում էին «Գլոբալ Սումուդ» նավատորմի նավերի վրա։

Նավատորմի կազմակերպիչները հայտնել են, որ ձերբակալվել է, ընդհանուր առմամբ, 223 միջազգային ակտիվիստ, և որ մինչև 20 նավակ է կանգնեցվել: Խմբի կողմից տարածված հաղորդագրության համաձայն՝ ևս 24 նավ շարունակել է իր ընթացքը դեպի Գազա։

Բժշկական պարագաներ և մարդասիրական բեռ տեղափոխող նավատորմը ծով է դուրս եկել օգոստոսի վերջին։ Սա տարիների ընթացքում ամենամեծ նմանատիպ առաքելությունն է, որին մասնակցում են ավելի քան 50 նավ և 45 երկրներից ավելի քան 500 ներկայացուցիչ։

Թարգմանությունը՝ Էմմա Չոբանյանի