29.06.2026 | 10:35
Փրկարարները Փամբակ գետում հայտնաբերել են հունիսի 27-ից որոնվող տղամարդու դին
Ֆիլիպիններում ուժեղ երկրաշարժի հետևանքով առնվազն 69 մարդ է զոհվել
Քաղաքականություն
01.10.2025 | 11:51
Ֆիլիպինների կենտրոնական հատվածում երեքշաբթի ուշ երեկոյան տեղի ունեցած հզոր երկրաշարժի հետևանքով առնվազն 69 մարդ է զոհվել։ Մոտավորապես ժամը 22:00-ին տեղի ունեցած 6,9 մագնիտուդով երկրաշարժը, ըստ պաշտոնյաների, անհայտ թվով բնակիչների արգելափակել է փլուզված տներում, գիշերային ակումբներում և այլուր՝ Բոգո քաղաքում և Սեբու նահանգի ծայրամասային գյուղական բնակավայրերում, գրում է ABC news-ը։
Փրկարարները որոնում են ողջ մնացածներին:
Երկրաշարժի էպիկենտրոնը գտնվում է Բոգոյից մոտավորապես 19 կիլոմետր (12 մղոն) հյուսիս-արևելք՝ Սեբու նահանգում։ Ըստ պաշտոնյաների՝ Բոգոյում զոհերի թիվը կարող է աճել, քանի որ պարբերաբար անձրևները, վնասված կամուրջներն ու ճանապարհները բարդացնում են փրկարարական աշխատանքները։
Երկրի Քաղաքացիական պաշտպանության գրասենյակի փոխտնօրեն Բեռնարդո Ռաֆայելիտո Ալեխանդրոն նշել է, որ Ֆիլիպինների կառավարությունը քննարկում է օտարերկրյա կառավարություններից օգնություն խնդրելու հարցը՝ հիմնվելով վնասի արագ գնահատման վրա, որը շարունակվում է:
Երկրաշարժը վերջին տասնամյակում կենտրոնական տարածաշրջանում տեղի ունեցած ամենաուժեղներից մեկն է։ Ֆիլիպինների հրաբխագիտության և սեյսմոլոգիայի ինստիտուտը ցունամիի մասին նախազգուշացում է տարածել՝ բնակիչներին խորհուրդ տալով Սեբուի ափերից և մոտակա Լեյտե և Բիլիրան նահանգներից՝ մինչև 1 մետր (3 ոտնաչափ) բարձրությամբ հնարավոր ալիքների պատճառով։ Նման ալիքներ չեն գրանցվել, և ցունամիի մասին նախազգուշացումը չեղարկվել է երեք ժամ անց։
Այնուամենայնիվ, հազարավոր տուժած բնակիչներ հրաժարվել են վերադառնալ տուն և նախընտրել են գիշերել բաց դաշտերում և այգիներում՝ չնայած պարբերաբար տեղացող անձրևին։
Երկրաշարժից տուժած քաղաքներում և գյուղերում դպրոցներն ու կառավարական գրասենյակները փակվել են՝ մինչ ստուգում են շենքերի անվտանգությունը։ Երեքշաբթի գիշերվա երկրաշարժից հետո գրացվել է ավելի քան 600 հետցնցում։
Թարգմանությունը՝ Էմմա Չոբանյանի
