07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ՌԴ դատարանը «Միստր Սիդր» ըմպելիքից թունավորման գործով Արտյոմ Հայրապետյանին ու Անար Հուսեյնովին դատապարտել է 8 և 9 տարվա ազատազրկման
Քաղաքականություն
22.09.2025 | 14:43
Սամարայի դատարանը դատավճիռ է կայացրել «Միստր Սիդր» («Мистер Сидр») ըմպելիքի արտադրության գործով մեղադրյալների նկատմամբ, որից թունավորման հետևանքով 2023 թվականին 50 մարդ էր մահացել, ավելի քան 66-ը՝ տուժել, փոխանցում է Meduza-ն։
Գործով անցնող Անար Հուսեյնովին և Արտյոմ Հայրապետյանին մեղադրանք է առաջադրվել Ռուսաստանի քրեական օրենսգրքի 238-րդ հոդվածի 3-րդ մասի համաձայն (անվտանգության պահանջներին չհամապատասխանող ալկոհոլ պարունակող արտադրանքի արտադրություն և վաճառք, որը հանգեցրել է մարդկանց մահվան):
Քննության վարկածով՝ 2023 թվականին Հուսեյնովը, Հայրապետյանի հետ միասին, Սամարայում վաճառքի համար կազմակերպել է խնձորօղու արտադրության օբյեկտ։ Նշվում է, որ խնձորօղին պատրաստվել է լուծվող հյութին էթիլային սպիրտ ավելացնելով։ Հայրապետյանը Ռուսաստանի ՆԳՆ Սամարայի մարզի գլխավոր վարչության պահեստից գողացված մոտ 4000 լիտր ալկոհոլային խմիչք է գնել Ալեքսեյ և Դմիտրի Եգորովներից, ինչպես նաև Իվան Գրեբյոնկինից (նրանց դատել են առանձին)։
Այդ սպիրտի կիրառմամբ, որը պարզվել է՝ մեթիլ է, արտադրվել է մոտ 48 հազար լիտր խմիչք՝ «Мистер Сидр» և «Лето Сидр» ապրանքանիշերով, վաճառվել է շուրջ 30 հազար լիտր։
Դատարանը Հուսեյնովին մեղավոր է ճանաչել «Միստր Սիդր»-ն արտադրելու համար և դատապարտել 9 տարվա ազատազրկման ընդհանուր ռեժիմի գաղութում։ Ալկոհոլ մատակարարելու մեջ մեղադրվող Հայրապետյանը դատապարտվել է ութ տարվա ազատազրկման ընդհանուր ռեժիմի գաղութում։
Մեղադրող կողմը պահանջել է ինը տարի և ինը ամիս ազատազրկում Հուսեյնովի և Հայրապետյանի համար։ Մեղադրյալները մասամբ ընդունել են իրենց մեղքը՝ հերքելով, որ գործել են որպես խումբ՝ նախապես համաձայնեցված։
Թարգմանությունը՝ Էմմա Չոբանյանի
