23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Թրամփը հայտարարել է, որ Սի Ցզինպինի հետ հեռախոսազրույցում առաջընթաց են գրանցել TikTok-ի և առևտրի հարցում և շուտով կհանդիպեն
Քաղաքականություն
19.09.2025 | 23:20
ԱՄՆ նախագահ Դոնալդ Թրամփը հայտարարել է, որ Չինաստանի նախագահ Սի Ցզինպինի հետ առաջընթաց են գրանցել TikTok-ի գործարքի հարցում և համաձայնել են անձամբ հանդիպել հաջորդ ամիս Հարավային Կորեայում, գրում է Reuters-ը։
«Մենք առաջընթաց ենք գրանցել շատ կարևոր հարցերի շուրջ, այդ թվում՝ առևտրի, ֆենտանիլի, Ռուսաստանի և Ուկրաինայի միջև պատերազմին վերջ դնելու անհրաժեշտության և TikTok գործարքի հաստատման հարցում»,- գրել է Թրամփը սոցիալական ցանցերում։
Նա նշել է, որ կհանդիպեն Հարավային Կորեայում կայանալիք Ասիա-խաղաղօվկիանոսյան տնտեսական համագործակցության կազմակերպության գագաթնաժողովում, որը կմեկնարկի հաջորդ ամիս, և որ ինքը կմեկնի Չինաստան հաջորդ տարեսկզբին։ Իսկ Սի Ցզինպինը, ըստ Թրամփի, ԱՄՆ կժամանի ավելի ուշ։
Հայտարարության մեջ չեն ուրվագծվել TikTok-ի վերաբերյալ առաջնորդների միջև ձեռք բերված համաձայնության պայմանները։ Սպիտակ տունը դեռևս պաշտոնապես չի մեկնաբանել իրավիճակը։
Չինական պետական լրատվամիջոցներն էլ հաղորդել են, որ Թրամփը և Սի Ցզինպինը «անկեղծ և խորը կարծիքների փոխանակում» են ունեցել, և որ զրույցը եղել է «պրագմատիկ, դրական և կառուցողական»։ Ըստ չինական կողմի՝ Սի Ցզինպինը հայտարարել է, որ ԱՄՆ-ը պետք է խուսափի սահմանափակող առևտրային միջոցառումներ կիրառելուց՝ «խորհրդատվությունների բազմաթիվ փուլերի միջոցով ձեռք բերված արդյունքները խաթարելուց խուսափելու համար»։
TikTok-ի հարցով Սի Ցզինպինը նշել է, որ Չինաստանի կառավարությունը «հարգում է ընկերությունների կամքը և ուրախ է տեսնել, թե ինչպես են ընկերությունները գործարար բանակցություններ վարում շուկայի կանոնների հիման վրա և հասնում լուծումների, որոնք համապատասխանում են չինական օրենքներին և կանոնակարգերին ու ապահովում շահերի հավասարակշռություն»։
«Մենք հույս ունենք, որ ամերիկյան կողմը կապահովի բաց, արդար և ոչ խտրական բիզնես միջավայր Միացյալ Նահանգներում ներդրումներ կատարող չինական ընկերությունների համար»,- ասվում է հաղորդագրության մեջ։
Թարգմանությունը՝ Էմմա Չոբանյանի
