18.12.2025 | 18:51
ԵՄ-ն պատժամիջոցների ցանկում ներառել է Ռուսաստանի «ստվերային նավատորմի» ևս 41 լցանավ
«Բիզնես Արմենիան» այս տարվա 9 ամիսներին 5.9 մլրդ դրամի արտահանում և 17 մլն դոլարի ներդրում է ապահովել
Տնտեսություն
19.10.2018 | 18:32
2018 թվականի 9 ամիսների ընթացքում «Բիզնես Արմենիա» հիմնադրամը 5 մլրդ 910 մլն դրամի արտահանման պայմանագիր է կնքել. անցյալ տարի այս ցուցանիշը 5.7 մլրդ դրամ է եղել: Այս մասին այսօր՝ հոկտեմբերի 19-ին լրագրողների հետ հանդիպմանը տեղեկացրեց «Բիզնես Արմենիա»-ի գործադիր տնօրեն Արմեն Ավակ Ավակյանը:
Հիմնադրամն ակնկալում է տարեվերջին արտահանման պայմանագրերի ծավալը հասցնել 7 մլրդ դրամի: Ինչ վերաբերում է ներդրումներին. Արմեն Ավակ Ավակյանի խոսքով՝ 2018 թ. համար «Բիզնես Արմենիա»-ն 46 մլն դոլարի ներդրում էր թիրախավորել էր, իսկ հունվարից սեպտեմբեր արդեն 17 մլն դոլարի ներդրում է ունեցել, ևս 28 մլն-ի ներդրման ակնկալիք էլ ունեն:
«Սա կկազմի 45 մլն դոլար: Այսինքն՝ շատ մոտ ենք լինելու մեր նախանշած թիրախին, և եթե մի քիչ էլ ագրեսիվ լինենք մեր թիմով, կարծում եմ՝ այդ ցուցանիշից էլ կանցնենք»,- ասաց Արմեն Ավակ Ավակյանը:
Հիմնադրամի ղեկավարը տրամաբանական է համարում, որ ներքաղաքական իրավիճակը որոշակիորեն ազդում է գործարարների՝ ներդրում կատարելու որոշման վրա, հատկապես սպասվող արտահերթ խորհրդարանական ընտրություններից առաջ. «Ցանկացած երկրում միշտ սպասողական վիճակ է լինում ընտրություններից առաջ: Օբյեկտիվ իրականություն է»:
Նա, միաժամանակ, վստահեցնում է, որ Հայաստանի հանդեպ օտարերկրյա ներդրողների հետաքրքրության աճ կա, հատկապես՝ սփյուռքահայերի: Նրանք հիմնականում հետաքրքրված են տեղեկատվական տեխնոլոգիաների, զբոսաշրջության, գյուղատնտեսության, ինչպես նաև դեղագործության ոլորտներով:
Հավելենք, որ այսօր տեղի է ունեցել «Բիզնես Արմենիա» հիմնադրամի հոգաբարձուների խորհրդի նիստը. ՀՀ տրանսպորտի, կապի և տեղեկատվական տեխնոլոգիաների նախարարը համալրել է խորհրդի կազմը:
