08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Ավելի քան 20 երկրներ Գազայում պատերազմն անհապաղ դադարեցնելու կոչ են արել
Քաղաքականություն
21.07.2025 | 20:12
Ավելի քան 20 այլ երկրներ կոչ են արել անհապաղ դադարեցնել պատերազմը Գազայում և քննադատել են Իսրայելի կառավարության օգնության տրամադրման մոդելը, այն բանից հետո, երբ հարյուրավոր պաղեստինցիներ են սպանվել սնունդ բաշխող վայրերի մոտ, գրում է Arab news-ը՝ Reuters-ին վկայակոչելով։
Մեծ Բրիտանիան Ֆրանսիան, Իտալիան, Ճապոնիան, Ավստրալիան, Կանադան, Դանիան և այլ երկրներ հայտարարել են, որ օգնություն խնդրելիս սպանվել է ավելի քան 800 պաղեստինցի և դատապարտել այն, ինչն անվանել են «կաթիլային օգնության և խաղաղ բնակիչների անմարդկային սպանություն»։
Սպանվածների մեծ մասը գտնվել է Գազայի մարդասիրական հիմնադրամի (GHF) մոտակայքում, որին Միացյալ Նահանգները և Իսրայելն աջակցել են՝ ՄԱԿ-ի գլխավորած ցանցից Գազայում օգնության բաշխումը ստանձնելու համար։
«Իսրայելի կառավարության օգնության տրամադրման մոդելը վտանգավոր է, սնուցում է անկայունությունը և զրկում Գազայի բնակիչներին արժանապատվությունից»,- ասվում է երկրների արտաքին գործերի նախարարների համատեղ հայտարարության մեջ։
Պատերազմը դադարեցնելու և Իսրայելի կողմից օգնության մատակարարման եղանակի վերաբերյալ կոչերը հնչում են մի քանի երկրներից, որոնք դաշնակից են Իսրայելին և նրա ամենակարևոր աջակից Միացյալ Նահանգներին։
Գազայի մարդասիրական հիմնադրամն օգտագործում է ԱՄՆ մասնավոր անվտանգության և լոգիստիկայի ընկերություններ՝ Գազա մատակարարումներ կատարելու համար, մեծ մասամբ շրջանցելով ՄԱԿ-ի գլխավորած համակարգը, որը, ըստ Իսրայելի, թույլ է տվել ՀԱՄԱՍ-ի գլխավորած զինյալներին թալանել քաղաքացիական անձանց համար նախատեսված օգնության առաքումները: ՀԱՄԱՍ-ը հերքում է մեղադրանքը։
ՄԱԿ-ը GHF-ի մոդելն անվանել է անապահով և մարդասիրական անաչառության չափանիշների խախտում, ինչը GHF-ը հերքում է։
Հավելենք, որ համատեղ հայտարարությունն արվել է Ավստրալիայի, Ավստրիայի, Բելգիայի, Կանադայի, Դանիայի, Էստոնիայի, Ֆինլանդիայի, Ֆրանսիայի, Իսլանդիայի, Իռլանդիայի, Իտալիայի, Ճապոնիայի, Լատվիայի, Լիտվայի, Լյուքսեմբուրգի, Նիդերլանդների, Նոր Զելանդիայի, Նորվեգիայի, Լեհաստանի, Պորտուգալիայի, Սլովենիայի, Իսպանիայի, Շվեդիայի, Շվեյցարիայի և Մեծ Բրիտանիայի արտաքին գործերի նախարարների, ԵՄ հավասարության, պատրաստվածության և ճգնաժամային կառավարման հարցերով հանձնակատարի կողմից։
Թարգմանությունը՝ Էմմա Չոբանյանի
