400 տարածքային գրասենյակ և միայն մեկ «Վազ 2121» ավտոմեքենա․ ՀՀԿ-ի գույքն ու ֆինանսավորումը 2024-ին

198․1 մլն դրամ մուտքեր, 195․1 մլն դրամ ելքեր և ոչ մի լումա ֆինանսավորում պետական բյուջեից․ սա 2024 թվականին Հայաստանի Հանրապետական կուսակցության ֆինանսական հաշվետվության տվյալներն են։

Հիշեցնենք, որ «Կուսակցությունների մասին» ՀՀ օրենքի համաձայն՝ բյուջետային ֆինանսավորում ստանում են այն կուսակցությունները, որոնց ընտրական ցուցակն Ազգային ժողովի վերջին ընտրությունների ժամանակ ստացել է քվեարկությանը մասնակցած բոլոր կուսակցությունների ընտրական ցուցակների օգտին կողմ ձայների ընդհանուր թվի և անճշտությունների թվի գումարի առնվազն 3 %-ը:

ՀՀԿ-ն այդ 3 %-ը չի ստացել, թեև ներկայացված է Ազգային ժողովում։

Միաժամանակ, կուսակցությունը ենթարկվել է աուդիտի, քանի որ մուտքեր/ելքերը գերազանցել են 25 մլն դրամը։ Աուդիտը խախտում չի արձանագրել։

ՀՀԿ-ի ֆինանսավորման հիմնական մասը՝ 190․5 մլն դրամ, գոյացել է կուսակցականների անդամավճարներից, 6․5 մլն դրամը նվիրատվություն է (622 հազար դրամը՝ բնեղենով նվիրատվություն), 1․1 մլն-ը՝ 3 անշարժ գույքը վարձակալության հանձնելուց ստացված եկամուտ է, ևս 25 հազար դրամ այլ մուտքեր են եղել։

Կուսակցության ծախսերի մեծ մասը՝ 109․5 մլն դրամ, աշխատանքի վարձատրություն է, մոտ 42 մլն դրամ՝ հարկեր և տուրքեր, 26․3 մլն-ը՝ կոմունալ վճարներ, 9․7 մլն-ը՝ գույքի վարձակալության ծախս, 3․4 մլն-ը՝ ապրանքանյութական արժեքներ ձեռք բերելու համար կատարված վճարներ, 4․2 մլն-ը՝ այլ ելքեր։

ՀՀԿ-ն շուկայականից էականորեն ցածր գնով գույք է վարձակալել Արթուր Ասոյանից՝ 38 հազար դրամով, և անհատական բնակելի տուն Անանիա Գաբիկյանից՝ 180 հազարով։

Կուսակցությունն ունի 400 տարածքային գրասենյակ և միայն 1 ավտոմեքենա՝ 1993 թվականի արտադրության «Վազ 2121»։

Հիշեցնենք, որ Factor.am-ն արդեն ներկայացրել է ՔՊ-ի, ՀՅԴ-ի, ԲՀԿ-ի, «Հանրապետություն» կուսակցության հաշվետվությունները։ Մյուս կուսակցությունների ֆինանսական մուտքերի և ելքերի մասին տվյալները՝ հաջորդիվ։ 

Գայանե Խաչատրյան