ԵԽ պատգամավորները չեն աջակցել Ուրսուլա ֆոն դեր Լեյենին անվստահություն հայտնելու նախաձեռնությանը

Ստրասբուրգում անցկացված նիստում Եվրախորհրդարանի պատգամավորները մերժել են Եվրահանձնաժողովի նախագահ Ուրսուլա ֆոն դեր Լեյենին անվստահություն հայտնելու նախաձեռնությանը։ Եվրախորհրդարանի  553 պատգամավորից 360-ը քվեարկել են  բանաձևի դեմ, գրում է Euronews-ը։

Բանաձևին կողմ է քվեարկել 175 պատգամավոր, դեմ՝ 360-ը, ձեռնպահ՝ 18-ը։

«Կողմ» ձայների թիվը զգալիորեն պակաս է եղել Եվրոպական հանձնաժողովի ղեկավարին անվստահություն հայտնելու և նրա հրաժարականի համար անհրաժեշտ երկու երրորդից։ Ուրսուլա ֆոն դեր Լեյենը քվեարկության ժամանակ դահլիճում չի եղել։ Նա Իտալիայի մայրաքաղաք Հռոմում է՝ Ուկրաինայի վերականգնմանը նվիրված միջազգային համաժողովին մասնակցելու համար։

Անվստահության հարցի նախագիծը ներկայացրել էր ռումինացի պատգամավոր Գեորգե Պիպերեան, այն ստորագրել էր աջակողմյան քաղաքական խմբերի 77 անդամ, այդ թվում՝ «Եվրոպական պահպանողականներ և ռեֆորմիստներ» (ECR), «Եվրոպայի հայրենասերներ» և «Սուվերեն ազգերի Եվրոպա» կուսակցությունները: Նրանց քննադատությունը կենտրոնանում է ֆոն դեր Լեյենի կողմից ԵՄ-ի համար Pfizer պատվաստանյութերի գնման գործընթացի ոչ թափանցիկ կառավարման և իշխանության նկատմամբ նրա ավելի ու ավելի կենտրոնացված մոտեցման վրա:

Համարվում է, որ հարցը քվեարկության դնելու փաստն արդեն խաթարել է Եվրոպական հանձնաժողովի ղեկավարի դիրքերը և կարող է հանգեցնել նրա ծրագրի աջակցության թուլացմանը Եվրախորհրդարանում։

Վերջին ամիսներին ֆոն դեր Լեյենը և կենտրոնամետ ԵԺԿ-ն քննադատության են ենթարկվել խորհրդարանական մի շարք որոշումներում ծայրահեղ աջակողմյաններին աջակցելու համար, ինչը խզել է ԵՄ ավանդական կենտրոնամետ կոալիցիաների՝ սոցիալիստների, լիբերալների և կանաչների հետ կապերը։ ԵԺԿ ղեկավարներից մեկը Euronews-ին ասել է, որ ֆոն դեր Լեյենը պետք է այժմ ավելի լավ համաձայնեցնի իր օրակարգը կուսակցության արժեքների հետ։

Ուրսուլա ֆոն դեր Լեյենի առաջին արձագանքը անվստահության քվեարկության տապալումից հետո կարճ է եղել։ Նա X սոցիալական ցանցում հաղորդագրություն է հրապարակել՝ շնորհակալություն հայտնելով Եվրախորհրդարանի պատգամավորներին աջակցության համար։

«Գլոբալ անկայունության և անկանխատեսելիության պահին ԵՄ-ն կարիք ունի ուժի, տեսլականի և գործելու կարողության։ Մեզ պետք են բոլորը և յուրաքանչյուրը՝ ընդհանուր մարտահրավերներին դիմակայելու համար։ Միասին։ Երբ արտաքին ուժերը փորձում են ապակայունացնել և բաժանել մեզ, մեր պարտականությունն է՝ արձագանքել մեր արժեքներին համապատասխան։ Շնորհակալություն, և կեցցե՛ Եվրոպան»,- գրել է Եվրահանձնաժողովի նախագահը։

Թարգմանությունը՝ Էմմա Չոբանյանի