16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Բարդ է լինելու, բայց չեմ կարծում, որ զենքերը պետք է վայր դնել. Նաիրա Զոհրաբյանը՝ արտահերթ ընտրություններին մասնակցելու մասին. ՏԵՍԱՆՅՈՒԹ
Քաղաքականություն
15.10.2018 | 13:44
ԱԺ «Ծառուկյան» խմբակցության պատգամավոր Նաիրա Զոհրաբյանը համոզված է՝ վարչապետի հրաժարականից հետո ֆորս մաժորային իրավիճակներ չեն լինի:
«Շատ հանգիստ երկու շաբաթը կանցնի: Վստահ կարող եմ ասել, որ որևէ քաղաքական ուժ վարչապետի թեկնածու չի առաջադրի, իսկ դա նշանակում է՝ Սահմանադրության համաձայն մենք հրաժարականից երկու շաբաթ անց կունենանք խորհրդարանի լուծարման սկիզբ»,- նշեց Նաիրա Զոհրաբյանը:
Պատգամավորն ասաց՝ պետք է պատրաստվել արտահերթ խորհրդարանական ընտրություններին հատկապես իրավական առումով: «Մենք առաջիկայում քննարկելու ենք Ընտրական օրենսգիրքը: Ես, օրինակ, մեծ վերապահում ունեմ այն դրույթի հետ, որ ԱԺ պարտադիր պետք է անցնեն նվազագույնը չորս քաղաքական ուժեր: Այստեղ մենք կունենանք խնդիր հանրային վստահության հետ»,- շարունակեց պատգամավորը՝ նշելով, որ այդուհանդերձ չի հաջողվելու Ընտրական օրենսգիրքն ամբողջ ծավալով քննարկել:
Ըստ Նաիրա Զոհրաբյանի՝ ստեղծված ոչ ստանդարտ քաղաքական իրավիճակում անտեսվելու են նաև Վենետիկի հանձնաժողովի հանձնարարականները:
Factor.am-ի հարցին՝ դա ի՞նչ հետևանք կարող է ունենալ Հայաստանի համար, պատգամավորը պատասխանեց. «Եթե հիմա ասեմ, որ Հայաստանին կկախեն, նման բան չի լինի, բայց մենք ստորագրել ենք փաստաթղթեր, որ պետք է կատարենք իրենց հանձնարարականները: Նրանք մեզ ասել են, որ դա մեր ներքին խնդիրն է»:
Մանրամասները՝ տեսանյութում:
