29.04.2026 | 15:55
Պատասխաններն անսպասելի են. Վարդապետյանը` Աբրահամյանի տան վաճառքի, Նարեկ Նալբանդյանի հյուրանոցի մասին. ՏԵՍԱՆՅՈՒԹ
Բագրատ Գալստանյանը ԱԱԾ մեկուսարանից նամակ է փոխանցել փաստաբանների միջոցով
Հասարակություն
26.06.2025 | 18:13
«Սրբազան Պայքարի» առաջնորդ, Բագրատ Գալստանյանը ԱԱԾ շենքում գտնվող «Երևան-Կենտրոն» ՔԿՀ-ից փաստաբանների միջոցով նամակ է փոխանցել ժղովրդին, որը ներկայացնում ենք ստորև.
«Իմ շատ սիրելի ժողովուրդ,
Նախ ցանկանում եմ ամբողջ սրտով խոնարհ շնորհակալություն հայտնել բոլորիդ ձեր աջակցության և զորակցության համար և ձեր ներողամտությունը հայցել անհարմարություններ պատճառելու համար։
Ստի և կեղծիքի վրա հիմնված չարիքի իշխանությունը այլ կերպ չի կարող վարվել, քան հալածելը, լռեցնելը բոլոր նրանց, ովքեր ճշմարտության և արդարության ճանապարհի մարտիկներ են, ում համար թանկ է Հայրենիքը, սեփական պետությունը և պատիվը։ Չկա ավելի քաղցր երևույթ, քան հալածվելը Հայրենիքի և պատվի համար։ Պատիվ է մեզ անցնել այս ճանապարհը։ Անկախ նրանից, թե ինչ որոշում կկայացնի դատարանը, իմ, մեր որոշումը մեկն է՝ մեր խոցված մոր՝ Մայր Հայաստանի ազատագրումը, մեր պատվի և ուրախության վերականգնումը։
Չտրտմե՛ք, չընկճվե՛ք, չկասկածե՛ք և չտատամսե՛ք. իր վերջին օրերն ապրող չարիքը գլորվելու է և մենք կերտելու ենք մեր կյանքի նոր արշալույսը։
Այո՛, Հոգևոր Հայաստանը պետք է հաղթի այս «նոր» հայաստանին,
Եռագույնը՝ սև ու սպիտակին,
Տաճարը՝ փողոցին։
Քանի որ մեր երազներն ու իղձերը ավելի են, քան մեր կյանքի սահմանափակ թվով օրերը։
Ապրում եմ կյանքիս ամենաերջանիկ օրերը, քանզի հենց ինձ և ձեզ է տրված իրականացնելու մեր Տան կառուցման առաքելությունը, կյանքի կոչելու մեր Ավետյաց Երկրի Տեսիլքը։
Մեր հաղթանակը այլընտրանք չունի…
Հ.Գ. Փաստաբան Սերգեյ Հարությունյանը նաև տեղեկացրեց, որ ՔՊ-ական պատգամավորները սուտ լուրեր են տարածում, իբր դատական նիստի ընթացքում հաստատել եմ չարիքի իշխանության տարածած ձայնագրությունների իսկությունը։ Ստի ու կեղծիքի իշխանությունը չի կարող այլ բան անել, քան սուտ ու կեղծիք տարածելը։ Բայց, ինչպես արդեն ասացի, ստի վերջը մոտ է։ Ամեն բան լավ է լինելու։
Բագրատ արք. Գալստանյան»։
Հիշեցնենք, որ երեկ ՔԿ-ն հաղորդագրություն էր տարածել, ըստ որի՝ «Սրբազան պայքար» անվանումով շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։ Երեկ վաղ առավոտից խուզարկություններ էին սկսվել «Սրբազան պայքարի» ղեկավար Բագրատ Գալստանյանի և նրա համակիրների բնակարաններում։ Արդեն կեսօրին իր կեցավայրից բերման էր ենթարկվել Գալստանյանը, ավելի ուշ հայտնի դարձավ, որ նրան մեղադրանք է առաջադրվել ահաբեկչություն նախապատրաստելու, զանգվածային անկարգություններ հրահրելու հոդվածներով։
Հիշեցնենք, նաև, որ ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանը «Ֆեյսբուք»-ի իր էջում արված գրառմամբ տեղեկացրել էր, որ Գալստանյանը դատարանում խոստովանել է՝ ձայնագրություններն իրական են:
«Բագրատ Գալստանյանը դատարանում խոստովանեց՝ ձայնագրությունները ԻՐԱԿԱՆ են, ոչ մի AI գործիք, իր խոսքերն են, իր ձայնը։
Ավելին՝ հղում անելով այդ ահաբեկչական խոսակցությանը՝ փաստաբանը հայտարարում է, որ ձայնագրություններից մեկում ախր կա «կախարդական» բառ՝ «իմպիչմենտ», որը, իբր, Բագրատին սրբի պես անմեղ է դարձնում։
Այսինքն՝ մի քանի մարդու կարող ես գյուլլել, ուղևորներ տեղափոխող ավտոբուսներ վառել, ամեն ինչ քանդել-փշրել կարելի ա, եթե վերջում ասես «իմպիչմենտ»։
Սա մոտավորապես էն ա, որ փոքր ժամանակ, երբ չէինք ուզում պարտվել, դաղալություն էինք անում ու ասում՝ «հոպ հաշիվ չի մատս խաչ եմ արել»:
Հիմա մեր «նախկին սրբազանը» էդպես ա՝ ճիշտ ա, ընդունում է, որ ահաբեկչություն պլանավորել ա, բայց խաչակնքվելով, որ օրինական լինի»,- գրել է Գաբրիելյանը:
