«Տեղավորվեցի՞ք»․ ինչպես Վարդան Ղուկասյանը դիմավորեց ՔՊ-ականներին

Գյումրիի ավագանու «Քաղաքացիական պայմանագիր» խմբակցությունը ընտրություններից հետո առաջին անգամ մասնակցում է ավագանու նիստին։ Նշենք, որ մինչ այս երկու նիստ է հրավիրվել։ Մեկով Վարդան Ղուկասյանն ընտրվեց քաղաքապետ, իսկ մյուսում անցկացվեց երդման արարողությունը։

ՔՊ-ականները նիստերի դահլիճ ներկայացան ուշացումով, երբ արդեն նիստը մեկնարկել էր և Վարդան Ղուկասյանը ներկայացնում էր խմբակցության ղեկավար կազմին։

«Տեղավորվեցի՞ք»,- հարցրեց Վարդան Ղուկասյանը, որին, գոնե համայնքապետարանի էջում հեռարձակվող ուղիղ եթերից դատելով, պատասխան չեղավ։

Հիշեցնենք՝ ընտրությունների արդյունքում «Քաղաքացիական պայմանագիր» կուսակցության թեկնածու Սարիկ Մինասյանը ստացել է 17 հազար 183 քվե, ձայների 36.24 տոկոսը, Հայաստանի կոմունիստական կուսակցության թեկնածու Վարդան Ղուկասյանը՝ 9 հազար 727 քվե, ձայների 20.51 տոկոսը, «Մայր Հայաստան» կուսակցությունների դաշինքի թեկնածու Կարեն Սիմոնյան՝ 2 հազար 902 քվե, ձայների 6.12 տոկոսը, «Մեր քաղաքը» կուսակցությունների դաշինքի թեկնածու Մարտուն Գրիգորյանը՝ 7 հազար 380 քվե, ձայների 15.56 տոկոսը, «Իմ հզոր համայնք» կուսակցության թեկնածու Ռուբեն Մխիթարյանը՝ 3 հազար 734 քվե, ձայների 7.87 տոկոսը, «Ապրելու երկիր» կուսակցությունը՝ 1 694 քվե, ձայների 6,12 տոկոսը, Հայաստանի աշխատավորական սոցիալիստական կուսակցությունը՝ 651 քվե, ձայների 1,37 տոկոսը, «Եվրադաշինք» կուսակցությունների դաշինքը՝ 2 հազար 111 քվե, ձայների 4,45 տոկոսը, «Դեմոկրատական այլընտրանք» կուսակցությունը՝ 1 406 քվե, ձայների 2,96 տոկոսը։

Անցողիկ շեմը հաղթահարած ընդդիմադիրները միավորվեցին և Վարդան Ղուկասյանին ընտրեցին Գյումրիի համայնքապետ։