30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Կայացել է «Խազեր»-ի առաջին մրցանակաբաշխությունը
Մշակույթ
01.05.2025 | 13:59
ԿԳՄՍ նախարարության աջակցությամբ Կ. Դեմիրճյանի անվան մարզահամերգային համալիրում Հայկական երաժշտական ակադեմիան անցկացրել է առաջին հայկական երաժշտական «Խազեր» մրցանակաբաշխությունը․ տեղեկացնում են ԿԳՄՍՆ-ից։
17 անվանակարգում պարգևատրվել են հայկական երգարվեստի տարբեր ժանրերի ներկայացուցիչները: Հաղթողներն ընտրվել են ակադեմիայի 300-ից ավելի անդամների քվեարկությամբ:
Մրցանակաբաշխությանը ներկա է եղել ԿԳՄՍ նախարարի տեղակալ Դանիել Դանիելյանը։ Նա հատուկ մրցանակ է հանձնել ՀԽՍՀ ժողովրդական արտիստ, պրոֆեսոր Ռուբեն Մաթևոսյանին: «Երգելու եմ մինչև կյանքիս վերջը»,- բեմից հայտարարել է Ռուբեն Մաթևոսյանը՝ ընդունելով մրցանակը։
«Յուրաքանչյուր սերունդ ունի իր լեգենդները։ Այսօր մեծարում ենք նրանցից մեկին՝ մարդու, որի ձայնն արձագանք է գտել բոլորի սրտերում, մարդու, որը պատմել է մեր կյանքի, մեր հայրենիքի, սիրո և հպարտության մասին»,- նշել է Դանիել Դանիելյանը՝ հանձնելով մրցանակը։
Անդրադառնալով մրցանակաբաշխությանը՝ ԿԳՄՍ նախարարի տեղակալն ուրախալի է համարել նոր ձևաչափով մրցանակաբաշխության կազմակերպումը, որը, ըստ նրա, Հայաստանում մշակույթի զարգացման արդյունք է։
«ԿԳՄՍ նախարարությունն աջակցել է մրցանակաբաշխությանը, քանի որ մրցանակակիրների ընտրության հետաքրքիր ձևաչափ կար՝ համահունչ «Գրեմմիին»: Ընտրության չափանիշները բարձր են, կարևոր է նաև այն, որ «Խազերն» ընդգրկում է դասական և ժողովրդական երաժշտությունը»,-նշել է նախարարի տեղակալը:
Միջոցառումն ուղեկցվել է երաժշտական արվեստի տարբեր ոլորտներ ընդգրկող յուրահատուկ համերգային կատարումներով: «Խազեր» հայկական երաժշտական մրցանակաբաշխության հատուկ հյուրն էր «Գրեմմի» կրկնակի մրցանակակիր, կոմպոզիտոր և պրոդյուսեր Քիթ Ուեյքլին, որը նաև Recording Academy-ի Տեխասի մասնաճյուղի ղեկավարն է:
