06.12.2025 | 10:53
Արտարժույթների փոխարժեքները՝ դեկտեմբերի 6-ի դրությամբ
Փաշինյանը մայիսի 9-ին կմեկնի՞ Մոսկվա՝ անտեսելով ԵՄ պաշտոնյաների հորդորը․ Factor.am-ի գրավոր ու բանավոր հարցումները մնում են անպատասխան
Քաղաքականություն
16.04.2025 | 18:18
ԵՄ պաշտոնյաների զգուշացումների ֆոնին, թե միության անդամության թեկնածու երկրները չպետք է մասնակցեն մայիսի 9-ին Մոսկվայում կայանալիք ռազմական շքերթին, ՀՀ վարչապետի աշխատակազմից պաշտոնապես չեն հայտնում՝ արդյոք Նիկոլ Փաշինյանը մեկնելո՞ւ է Ռուսաստանի Դաշնություն, թե՝ ոչ։
Factor.am-ը գրավոր հարցում էր ուղարկել վարչապետի աշխատակազմ՝ հետաքրքրվելով, թե հաշվի առնելով ԵՄ զգուշացումները՝ Նիկոլ Փաշինյանը մասնակցելո՞ւ է Մոսկվայում կայանալիք Հաղթանակի միջոցառումներին, թե՝ ոչ։
Մեր գրավոր հարցումը վարչապետի աշխատակազմի տեղեկատվության և հասարակայնության հետ կապերի վարչությունը վերահասցեագրել է «Հանրային կապերի և տեղեկատվության կենտրոն» ՊՈԱԿ-ին։ Երբ փորձեցինք պարզել, թե ինչ փուլում է մեր հարցման պատասխանը, ՊՈԱԿ-ի տնօրեն Գոռ Ծառուկյանը նախ զարմացավ, որ հարցումն իրենց է հասցեագրվել, հետո էլ ասաց, թե արձակուրդում է և որևէ տեղեկություն չունի հայտնելու։
Ամբողջ օրվա ընթացքում մեզ չհաջողվեց կապ հաստատել ո՛չ վարչապետի աշխատակազմի տեղեկատվության և հասարակայնության հետ կապերի վարչության պետ Արմեն Խաչատրյանի, ո՛չ էլ՝ Փաշինյանի մամուլի խոսնակ Նազելի Բաղդասարյանի հետ։ Նրանք կա՛մ անջատում էին հեռախոսը, կա՛մ անհասանելի են։
Factor․am-ը հարցի վերաբերյալ մինչ այս փորձել էր տեղեկություններ ստանալ նաև Նիկոլ Փաշինյանի թիմակից պատգամավորներից։ ԱԺ նախագահ Ալեն Սիմոնյանն ակնարկել էր Փաշինյանի Մոսկվա գնալու մասին, հայտարարելով՝ թե ՀՀ-ն առաջնորդվում է սեփական շահերով։ ԱԺ նախագահի խոսքով՝ մայիսի 9-ի հաղթանակը նաև մեր հաղթանակն է, 300 հազար զոհ ենք ունեցել: Ըստ Ալեն Սիմոնյանի՝ ԵՄ շատ առաջնորդներ այցելում են Մոսկվա, հանդիպում և բանակցում են ՌԴ նախագահ Վլադիմիր Պուտինի հետ։
«Հանուն Հանրապետության» կուսակցության փոխնախագահ Ռուբեն Մեհրաբյանի կարծիքով՝ Նիկոլ Փաշինյանը չպետք է Մոսկվա մեկնի։
Նա նշեց, որ ֆաշիզմի դեմ տարած հաղթանակում Հայաստանն իր լուման ունի, Երևանում էլ այդ հաղթանակին նվիրված հուշարձաններ կան, որտեղ կարելի է այդ օրն այցելել։ Ըստ Մեհրաբյանի՝ Ռուսաստանը Երկրորդ աշխարհամարտում տարած հաղթանակում մենաշնորհ չունի, իսկ Հայաստանի ղեկավարությունը մայիսի 9-ին անելիք ունի Երևանում։
«Հանուն Հանրապետության» կուսակցության փոխնախագահի դիտարկմամբ՝ Մոսկվա գնալուց օգուտ չկա, իսկ վնասները բազմաթիվ են։
«Ռուսաստանի ղեկավարությունը մայիսի 9-ը օգտագործում է որպես գաղափարական բազա իր ֆաշիստական քաղաքականության համար, այնտեղ Հայաստանն ինչի՞ պետք է ներկա լինի։ Եթե Փաշինյանը Մոսկվա գնա, Հայաստանի ռեպուտացիայի վրա մեծ բիծ է հայտնվելու՝ մանավանդ այդ այլանդակությունների, մարդասպանություններին ֆոնին, որոնք իրականացնում է Ռուսաստանը և արժանանում ամբողջ աշխարհի դատապարտմանը։ Հայաստանն այդ ամենի հետ որևէ ձևով չպետք է ուղղակի կամ անուղղակի ասոցացվի»,- նկատեց մեր զրուցակիցը։
Մեհրաբյանի խոսքով՝ Ռուսաստանը մեր դեմ վարում է հիբրիդային պատերազմ։
«Եթե մտածում ենք՝ մայիսի 9-ին Մոսկվա գնալով այդ հիբրիդային պատերազմը դադարելու է, իհարկե, դա այդպես չէ։ Մենք տեսնում ենք, թե ՌԴ-ն այսօր ինչ հիբրիդային գրոհներ է իրականացնում ՀՀ-ում իր 5-րդ շարասյան միջոցով։ ՌԴ-ն ամեն ինչ անում է Հայաստանը ներսից պայթեցնելու համար։ Գնալը ոչինչ չի փոխում»,- եզրափակեց նա։
Ավելի վաղ ԵՄ արտաքին գործերի և անվտանգության քաղաքականության հարցերով բարձրաստիճան ներկայացուցիչ Կայա Կալլասը ԵՄ ԱԳ նախարարների հանդիպման ժամանակ հայտարարել էր, որ ԵՄ անդամության թեկնածու երկրները պետք է չմասնակցեն Մոսկվայում մայիսի 9-ի զորահանդեսին։ Իսկ Լատվիայի արտաքին գործերի նախարար Բաիբա Բրաժեն էլ ակնարկել էր հնարավոր պատժամիջոցների կիրառման մասին։
Նշենք, որ Հայաստանը թեև ԵՄ անդամության թեկնածու չէ, սակայն ՀՀ ԱԺ-ն ավելի վաղ ընդունել էր «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Հիշեցնենք՝ մարտի 14-ին ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի միջև կայացած հեռախոսազրույցից հետո Կրեմլի փոխանցմամբ՝ «Հայաստանի վարչապետը հաստատել է, որ ընդունում է Ռուսաստանի նախագահի հրավերն ու մասնակցելու է մայիսի 9-ին Մոսկվայում նախանշված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին»։
Մարտին էլ վարչապետի մամուլի խոսակ Նազելի Բաղդասարյանը տեղեկացրել էր, որ մայիսի 9-ին ՌԴ-ում Փաշինյան-Պուտին-Ալիև եռակողմ ձևաչափով հանդիպում նախատեսված չէ, առանց հստակեցնելու՝ արդյոք, առհասարակ, Փաշինյանի Մոսկվա այց նախատեսված է, թե՝ ոչ։
Հավելենք նաև, որ նախորդ տարի Նիկոլ Փաշինյանը չէր մեկնել Մոսկվա և չէր մասնակցել Հաղթանակի շքերթին։ Փաշինյանը Մոսկվայում Հաղթանակի տոնակատարություններին մասնակցել էր 2023 թվականի մայիսի 9-ին։
Մանյա Պողոսյան
