Վիլեն Գաբրիելյանի պատգամավորական լիազորությունները դադարեցվել են

Ալեն Սիմոնյանը արձանագրություն է ստորագրել պատգամավոր Վիլեն Գաբրիելյանի լիազորությունները դադարեցնելու մասին։ Այս մասին Factor.am-ը  տեղեկացավ Ազգային ժողովի կայքից։ Այսօր լրացավ Վիլեն Գաբրիելյանի կողմից ԱԺ աշխատակազմին մանդատը վայր դնելու վերաբերյալ դիմում ներկայացնելու մեկ շաբաթը: Ավելի վաղ ԱԺ նախագահի մամուլի խոսնակ Մովսես Հարությունյանը Factor.am-ին փոխանցել էր, որ Վիլեն Գաբրիելյանը մանդատը վայր դնելու դիմումը հետ չի վերցրել։

Նշենք, որ «Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն եթե հրաժարականի հրապարակումից հետո մեկ շաբաթվա ընթացքում պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված:

Հիշեցնենք` մարտի 30-ին Գյումրիում տեղի ունեցած ավագանու արտահերթ ընտրություններից հետո` ապրիլի 1-ին, Վիլեն Գաբրիելյանը ֆեյսբուքի էջում գրառում էր արել՝ հայտնելով, որ վայր է դնում պատգամավորական մանդատը՝ կիրակի օրը Գյումրիում իր մասնակցությամբ միջադեպով պայմանավորված։

Գյումրիում ավագանու ընտրությունների օրը միջադեպ էր տեղի ունեցել ընտրությունները լուսաբանող լրագրողների և ՔՊ-ական պատգամավոր Վիլեն Գաբրիելյանի միջև։ Երբ լրագրողներից մեկն ավելի ուշ մանդատը վայր դնելու պահանջ էր հնչեցրել՝ Գաբրիելյանն ասել էր. «Մեկ է` 2026-ին իշխանությունը փոխվելու է, խի՞ եմ ես մանդատս հիմա վայր դնում»։    

 Մանյա Պողոսյան