Վիլեն Գաբրիելյանը մանդատը վայր դնելու դիմումը հետ չի վերցրել

«Քաղաքացիական պայմանագիր» կուսակցության պատգամավոր Վիլեն Գաբրիելյանը մանդատը վայր դնելու դիմումը հետ չի վերցրել, այս մասին Factor.am-ին հայտնեց ԱԺ նախագահի մամուլի խոսնակ Մովսես Հարությունյանը:

Նշենք, որ «Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված: Այսօր լրանում է մեկ շաբաթը, որ Վիլեն Գաբրիելյանը մանդատը վայր դնելու վերաբերյալ դիմում էր ներկայացրել ԱԺ աշխատակազմին:

Հիշեցնենք` մարտի 30-ին Գյումրիում տեղի ունեցած ավագանու արտահերթ ընտրություններից հետո` ապրիլի 1-ին, Վիլեն Գաբրիելյանը ֆեյսբուքի էջում գրառում էր արել՝ հայտնելով, որ վայր է դնում պատգամավորական մանդատը՝ կիրակի օրը Գյումրիում իր մասնակցությամբ միջադեպով պայմանավորված։ 

Գյումրիում ավագանու ընտրությունների օրը, միջադեպ էր տեղի ունեցել ընտրությունները լուսաբանող լրագրողների և ՔՊ-ական պատգամավոր Վիլեն Գաբրիելյանի միջև։ Երբ լրագրողը մանդատը վայր դնելու պահանջ էր հնչեցրել՝ Գաբրիելյանն ասել էր. «Մեկ է` 2026-ին իշխանությունը փոխվելու է, խի՞ եմ ես մանդատս հիմա վայր դնում»։  

Մանյա Պողոսյան