06.09.2026 | 11:51
Վթարային ջրանջատում Արարատում և Գեղարքունիքում
Չնայած Թրամփի վերջնագրերին՝ Իրանի հետ մեծ պատերազմը քիչ հավանական է․ Հայկ Քոչարյան․ ՏԵՍԱՆՅՈՒԹ
Քաղաքականություն
01.04.2025 | 20:15
Իսրայելական և ադրբեջանական մի շարք լրատվամիջոցների հրապարակումներն այն մասին, որ Ադրբեջանը կարող է միանալ Աբրահամյան համաձայնագրերին, որոնք ենթադրում են Իսրայելի հետ հարաբերությունները կարգավորած արաբական (մահմեդական) երկրներին ԱՄՆ-ի աջակցություն, դաշտ է նետել ադրբեջանական կողմը։ Դա արտացոլում է Բաքվի ցանկությունը՝ կապեր հաստատել ԱՄՆ նոր վարչակազմի հետ՝ օգտագործելով Իսրայելի ռեսուրսները, կարծում է արևելագետ, ԵՊՀ արաբագիտության ամբիոնի վարիչ Հայկ Քոչարյանը։
Factor TV-ի հետ զրույցում Քոչարյանն ընդգծում է՝ Ադրբեջանի հետ Իսրայելի համագործակցության հիմնական պատճառն Իրանի խնդիրն է։ Միաժամանակ, Իսրայելի հարաբերություններն ԱՄՆ վարչակազմի հետ այդքան էլ լավը չեն, որքան համարվում է, և իսրայելական կողմը հազիվ թե հնարավորություն ունի Ադրբեջանի շահերի արդյունավետ լոբբինգ անել։
Անդրադառնալով հայ-իսրայելական հարաբերություններին՝ արևելագետը կարծիք է հայտնում, որ Հայաստանը բավականաչափ ջանքեր չի գործադրել դրանց բարելավելու համար, չնայած միջազգային այժմյան իրադրությունը բարենպաստ է դրա համար։
Ինչ վերաբերում է Սիրիային, ըստ Հայկ Քոչարյանի՝ միջազգային խաղացողների մեծ մասը Սիրիայում կայունության հարցը վստահել է Թուրքիային, այս համատեքստում այդ երկրի հետ համագործակցությունը Հայաստանին հնարավորություն կտա լուծել Սիրիայի հայ համայնքի հետ կապված մի շարք հարցեր։
Հարցազրույցն ամբողջությամբ՝ տեսանյութում։
Սամվել Մելիքսեթյան
