Ճիշտ որոշում է․ Կիևում մեկնաբանել են ՀՀ ԱԺ-ի ընդունած ԵՄ-ին անդամակցության գործընթացի մասին նախագիծը

Հայաստանի որոշումը՝ գնալ դեպի ԵՄ-ին անդամակցություն, շատ ճիշտ է։ Այս մասին AnalitikaUA-ի հետ զրույցում հայտարարել է Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը։

Նա նշել է, որ Եվրոպան հեռանկարային շուկա է՝ բարձր մրցակցությամբ, բայց, միևնույն ժամանակ, տեղ զբաղեցնելու, լավ գումար վաստակելու և ֆինանսական ու տեխնոլոգիական մեծ հնարավորությունների հասանելիության հնարավորություններով։

«Իմ կարծիքով՝ սա լավագույն տարբերակն է Հայաստանի համար։ Կրկին ինտեգրվում եք ժամանակակից համաշխարհային հանրությանը։ Աշխարհը բաց է, սահմանները բաց են, և սա կտրուկ կբարելավի կյանքի որակը և կկայունացնի իրավիճակը բուն Հայաստանում։ Ինձ համար ակնհայտ է, որ եվրաինտեգրումը միշտ ճիշտ ընտրություն է։ Այլ հարց է, որ մենք միասին գտնվում ենք նույն դաշտում՝ նախկին խորհրդային դաշտը, որը Ռուսաստանն իրենն է համարում»,- հավելել է Պոդոլյակը։

Նա կարծում է, որ Մոսկվան հնարավորինս կավելացնի ճնշումը Հայաստանի վրա, ինչպես դա արել է Ուկրաինայի պարագայում, նաև կանի հնարավոր ամեն ինչ՝ խոչընդոտելու ՀՀ-ի եվրաինտեգրմանը։

«Ռուսաստանի համար շատ կարևոր է, որ հետխորհրդային տարածքը երևա անբարեկարգ, ավերված, քաոսային, և Ռուսաստանից բացի՝ ոչ ոք չկարողանա այնտեղ որևէ ծրագիր իրականացնել և թույլ տալ մարդկանց ապրել եկամուտների այլ մակարդակով»,- նշել է Պոդոլյակը՝ հավելելով, որ Ռուսաստանը կարող է գերիշխել միայն այնտեղ, որտեղ կան շատ թույլ շուկաներ, թույլ զարգացած տեխնոլոգիաներ և ցածր կենսամակարդակ, քանի որ հնարավոր է սպեկուլյատիվ սակարկել նման երկրների հետ և փոխարենը գազը վաճառել 20%-ով ավելի էժան։

Թարգմանությունը՝ Էմմա Չոբանյանի