18.12.2025 | 22:20
Վթար Ներքին Դվին գյուղում․ կան տուժածներ
Թուրքիան ու ԱՄՆ-ը ցանկանում են վերացնել պաշտպանական արդյունաբերության ոլորտում համագործակցության սահմանափակումները․ Reuters
Քաղաքականություն
26.03.2025 | 16:05
Թուրքիան և Միացյալ Նահանգները ցանկանում են վերացնել պաշտպանական արդյունաբերության ոլորտում համագործակցության խոչընդոտները։ Այս մասին Reuters-ին ասել է Թուրքիայի ԱԳՆ աղբյուրը՝ Վաշինգտոնում երկու երկրների բարձրաստիճան դիվանագետների բանակցություններից հետո։
Թուրքիայի արտաքին գործերի նախարար Հաքան Ֆիդանը սկսել է երկօրյա այցը Վաշինգտոն, որտեղ նա պետքարտուղար Մարկո Ռուբիոյին և ամերիկացի այլ պաշտոնյաների կխնդրի չեղարկել Թուրքիայի դեմ ԱՄՆ պատժամիջոցները և թույլ տալ նրան վերադառնալ կործանիչների կարևորագույն ծրագրին: Ֆիդանի այցը տեղի է ունենում նաև Թուրքիայի նախագահ Ռեջեփ Թայիփ Էրդողանի համար վճռորոշ ժամանակաշրջանում, երբ Ստամբուլի քաղաքապետ Էքրեմ Իմամօղլուի կալանավորումից հետո երկրում հակակառավարական ցույցեր են սկսվել։
Աղբյուրը նշել է, որ Ֆիդանի և Ռուբիոյի հանդիպման ժամանակ երկու կողմերն էլ «ակնհայտորեն դրսևորել են քաղաքական կամք՝ պաշտպանական արդյունաբերության ոլորտում համագործակցության խոչընդոտները վերացնելու համար»։
«Տեխնիկական բանակցություններ կանցկացվեն առկա խնդիրների լուծման համար»,- ասել է գործակալության աղբյուրը։
Թրամփն իր առաջին պաշտոնավարման ընթացքում պատժամիջոցներ էր կիրառել Թուրքիայի նկատմամբ Ամերիկայի հակառակորդներին հակազդելու մասին օրենքի (CAATSA) համաձայն՝ Անկարայի կողմից 2019 թվականին ռուսական հակաօդային պաշտպանության C-400 համակարգերի ձեռքբերման պատճառով: Այս պատճառով Թուրքիան նաև հեռացվել էր F-35 կործանիչների ծրագրից։
Թուրք անանուն պաշտոնյան Ֆիդանի այցից առաջ Reuters-ին ասել էր, որ Անկարան ձգտում է համաձայնության գալ Վաշինգտոնի հետ, որ C-400-ներն անգործունակ պահելը բավական է խնդրի լուծման համար:
Թուրք պաշտոնյան նաև ասել է, որ Վաշինգտոնի և Անկարայի միջև քննարկումները «նոր հարթություն են ստացել» Մոսկվայի նկատմամբ Թրամփի մոտեցումների փոփոխությունից հետո։
«Եթե Ռուսաստանի նկատմամբ ԱՄՆ-ի պատժամիջոցները չեղարկվեն, ապա անտրամաբանական է դառնում, որ CAATSA-ն կիրառվի երրորդ երկրների նկատմամբ: Ինչքան այս հարցը վերաբերում է Թուրքիա-ԱՄՆ հարաբերություններին, նույնքան էլ վերաբերում է Թուրքիա-Ռուսաստան կապերին»,- ասել է նա։
Իրավիճակին ծանոթ աղբյուրները նշում են, որ Էրդողանի և Թրամփի հեռախոսազրույցը կարող էր դրական խթան հանդիսանալ բանակցությունների համար, թեև խոստումներ չեն տրվել:
Թուրքական աղբյուրը հայտնել է, որ Ֆիդանն ու Ռուբիոն քննարկել են նաև պետական մակարդակով առաջիկայում կայանալիք այցերը՝ մանրամասներ չներկայացնելով։
Թարգմանությունը՝ Էմմա Չոբանյանի
