10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Հայաստանը չի արել տարրական բաներ Ադրբեջանում պահվող հայ պատանդների համար․ Ռուբեն Վարդանյանի փաստաբանը դիմել է Նիկոլ Փաշինյանին
Քաղաքականություն
06.03.2025 | 12:51
Ադրբեջանում ապօրինի պահվող Արցախի նախկին պետնախարար Ռուբեն Վարդանյանի փաստաբան Ջարեդ Գենսերն անդրադարձել է հայ գերիների ազատ արձակման վերաբերյալ ՀՀ վարչապետ Նիկոլ Փաշինյանի հայտարարություններին։
«Ես լիովին համաձայն եմ Հայաստանի վարչապետ Նիկոլ Փաշինյանի հետ, որ նա պետք է «համաչափ» և «խելամիտ» ջանքեր գործադրի իմ պաշտպանյալ Ռուբեն Վարդանյանին և մյուս հայ քրիստոնյա քաղբանտարկյալներին ու գերիներին ազատ արձակելու համար, որոնք պահվում են Ադրբեջանի կողմից։ Դա է պատճառը, որ այս ցուցակի բոլոր կետերը գալիս են բացառապես այն օրինակներից, որոնք այլ կառավարություններ արել են իմ 25 տարվա փորձի ընթացքում՝ աշխատելով օտարերկրյա պատանդներին ազատ արձակելու համար: Անշուշտ, հայ պատանդներն արժանի են գոնե այնքան օգնության, որքան մյուս կառավարություններն են ցուցաբերում, այնպես չէ՞»,- X-ի իր միկրոբլոգում գրել է փաստաբանը՝ կրկին ներկայացնելով իր կողմից առաջակները գերիներին ազատ արձակելու, որը ավելի էր հրապարակել։
Գենսերը նշել է, որ երբ, օրինակ, ներկայացրել է Իրանում երկու ամերիկացի պատանդի՝ Սիա Նամազի և նրա հոր շահերը, ԱՄՆ-ը պետական բանագնաց էր նշանակել պատանդների հարցով, որն աշխատում էր այդ գործով, Սպիտակ տունը և Պետքարտուղարությունը, այդ թվում՝ պետքարտուղարը, պարբերաբար հանդիպում էին իր հաճախորդների ընտանիքների հետ։ Իրանում Շվեյցարիայի դեսպանությունում Միացյալ Նահանգներն ուներ «ԱՄՆ շահերի բաժին», որը հանդես էր գալիս բանտերում պահման պայմանների բարելավման համար և փորձում էր վերահսկել դատական գործընթացները։ ԱՄՆ նախագահն ու պետքարտուղարը հրապարակային բարձրաձայնում էին, ամերիկացի դիվանագետները՝ իրենց դաշնակիցների հետ, հանդես էին գալիս ՄԱԿ-ում օգնության խնդրանքով, ԱՄՆ-ն աջակցություն է խնդրել համաշխարհային կրոնական առաջնորդներից, պատժամիջոցներ է սահմանել իրանցի այն պաշտոնատար անձանց նկատմամբ, որոնք պատասխանատու էին պատանդ վերցնելու համար։
«Այս ամենը ողջամիտ և համաչափ էր Միացյալ Նահանգների համար: Այդուհանդերձ, ի զարմանս ինձ, որքան ես կարող եմ ասել, Հայաստանը չի արել նման շատ տարրական բաներից և ոչ մեկը Ադրբեջանում գտնվող հայ պատանդների համար: Ուստի, ես հարցնում եմ ՀՀ վարչապետ Նիկոլ Փաշինյանին՝ Դուք համաձա՞յն եք, որ այս ամենը ողջամիտ ու համաչափ է կամ Դուք, իրոք, ասում եք, որ այն ջանքերը, որոնք ձեռնարկվել են նախագահ Թրամփի կողմից՝ Բելառուսից ամերիկացի Մարկ Ֆոգելին և Վենեսուելայից վեց ամերիկացի պատանդներին ազատ արձակելու հարցում, ոչ խելամիտ և անհամաչափ են եղել»,- գրել է Ռուբեն Վարդանյանի փաստաբանը։
Թարգմանությունը՝ Էմմա Չոբանյանի
