09.10.2026 | 11:05
COP17-ին ընդառաջ Կառավարությունը ԱԺ-ում օրենքի նախագիծը ներկայացնելու պատասխանատու է նշանակել
Չեք կարող 2 մլն մարդու ասել՝ հեռացեք․ Մակրոնը քննադատել է Գազայի հետ կապված Թրամփի հռետորաբանությունը
Քաղաքականություն
12.02.2025 | 16:40
ԱՄՆ նախագահ Դոնալդ Թրամփի՝ Գազայի հատվածին «տիրանալու» առաջարկի շուրջ վրդովմունքի ֆոնին Ֆրանսիայի նախագահ Էմանուել Մակրոնը կոչ է արել հարգել պաղեստինցիներին և նրանց արաբ հարևաններին՝ մերժելով Գազայի բնակիչներին իրենց հայրենիքից զանգվածային տեղահանելու՝ ԱՄՆ նախագահի գաղափարը:
«Դուք չեք կարող 2 միլիոն մարդուն ասել՝ լավ, հիմա գուշակեք՝ ինչ է լինելու։ Դուք կտեղափոխվեք»,- հայտարարել է Մակրոնը CNN-ին տված բացառիկ հարցազրույցում, որը տեսագրվել է այս շաբաթ Փարիզում կայացած AI գագաթնաժողովից առաջ:
«Ճիշտ պատասխանն է՝ սա անշարժ գույքի գործարք չէ, սա քաղաքական գործարք է»,- ասել է նա։
Թեև Ֆրանսիան 2023 թվականի հոկտեմբերի 7-ին ՀԱՄԱՍ-ի հարձակումից հետո անկեղծորեն պաշտպանել է Իսրայելի ինքնապաշտպանության իրավունքը, Մակրոնը չի խուսափում հրապարակայնորեն դատապարտել Իսրայելի քաղաքականությունն ու վարքագիծը Գազայում և Լիբանանում նրա ռազմական գործողություններում:
«Ես միշտ կրկնել եմ իմ անհամաձայնությունը [Իսրայելի] վարչապետ Նեթանյահուի հետ։ Ես ևս մեկ անգամ չեմ հավատում, որ նման լայնածավալ գործողությունը, որը երբեմն ուղղված էր խաղաղ բնակչության դեմ, ճիշտ պատասխան է»,- ասել է Մակրոնը։
Նա նշել է, որ Գազայի վերականգնմանն ուղղված ցանկացած «արդյունավետ» պատասխան «ինքնաբերաբար չի նշանակում, որ չպետք է հարգեք մարդկանց կամ երկրներին»՝ ընդգծելով պաղեստինցիների՝ իրենց հայրենիքում մնալու ցանկությունը և Հորդանանի ու Եգիպտոսի դժկամությունը Գազայից մեծ թվով փախստականներ ընդունելու հարցում։
Ֆրանսիան, ինչպես և միջազգային հանրությունը, կտրուկ դեմ են արտահայտվել Թրամփի ծրագրերին։
Հիշեցնենք, որ Թրամփն առաջարկել էր Գազան հանձնել ԱՄՆ-ի վերահսկողությանը, իսկ պաղեստինցիներին՝ հեռանալ այնտեղից։
Թարգմանությունը՝ Էմմա Չոբանյանի
