30.04.2026 | 12:10
Ադրբեջանով հացահատիկ է գալիս ՀՀ // «Խաղաղության խորհրդի» կանոնադրությունը հաստատվեց․ ԼՈՒՐԵՐ
Վաշինգտոնում բողոքի ցույցեր են անցկացվել ընդդեմ USAID-ի փակման․ ՏԵՍԱՆՅՈՒԹ
Քաղաքականություն
04.02.2025 | 12:34
Շուրջ հարյուր ամերիկացիներ հավաքվել են Վաշինգտոնում ԱՄՆ Միջազգային զարգացման գործակալության (USAID) կենտրոնակայանի շենքի մոտ՝ բողոքելու Թրամփի վարչակազմի կողմից գործակալության փակման որոշման դեմ, գրում է The New York Times-ը:
Նրանց են միացել դեմոկրատ օրենսդիրներ, որոնք հայտարարել են, որ պայքարելու են Կոնգրեսը շրջանցելու և դաշնային գործակալությունը ոչնչացնելու՝ Իլոն Մասկի ջանքերի դեմ:
«Մենք չունենք իշխանության չորրորդ ճյուղ՝ Իլոն Մասկ անունով։ Այս անօրինական, հակասահմանադրական միջամտությունը Կոնգրեսի իշխանությանը սպառնում է ամբողջ աշխարհում մարդկանց կյանքերին»,- ասել է սենատոր Ջեյմի Ռասկինը։
Օրենսդիրը հիշեցրել է միլիարդատիրոջը, որը հայտարարել էր, թե «ժամանակն է լուծարել USAID»-ը, որ ոչ թե նա է վերահսկում ամերիկացիների փողերը, այլ Միացյալ Նահանգների Կոնգրեսը։
Սենատոր Քրիս Մերֆին էլ Մասկին անվանել է «միլիարդատերերի չընտրված դասի մի մաս, որը փորձում է տիրել երկրի կառավարությանը»:
Արտասովոր բողոքի ակցիան ընդգծել է գործակալության շուրջ լարվածության աճը: Թրամփի վարչակազմն աշխատանքից հեռացրել է կազմակերպության բարձրաստիճան պաշտոնյաներին, արգելել պետական աշխատողներին և կապալառուներին մուտք գործել USAID-ի համակարգեր, իսկ աշխատակիցներին հրահանգել երկուշաբթի օրը մնալ տանը՝ հայտարարելով, որ գործակալության շենքը փակ է լինելու:
Սենատի և Ներկայացուցիչների պալատի մի խումբ դեմոկրատների նույնպես արգելվել է մուտք գործել գործակալության կենտրոնակայան։ Անվտանգության ծառայությունը հայտնել է, որ գրասենյակը հասանելի չէ այցելուներին։
Օրենսդիրներն արդեն աշխատում են դատական հայց ներկայացնելու ուղղությամբ՝ արգելափակելու Թրամփի վարչակազմի և Մասկի գերատեսչության՝ գործակալությունը լուծարելու ջանքերը:
Թարգմանությունը՝ Տաթև Ֆռանգյանի
