08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ԵՄ-ն նախազգուշացնում է արդեն 2028 թվականին ռուսական հարձակման սպառնալիքի մասին
Քաղաքականություն
22.01.2025 | 21:13
Ռուսաստանը կարող է ռազմական ագրեսիա սկսել Եվրամիության երկրներից մեկի դեմ արդեն 2028 թվականին, նախազգուշացրել է ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը։
«Մեր ազգային հետախուզական ծառայություններից շատերը մեզ տվյալներ են տալիս, որ Ռուսաստանը կարող է ստուգել մեր պաշտպանական պատրաստվածությունը երեքից հինգ տարի հետո»,- ասել է Կալլասը ելույթ ունենալով Բրյուսելում Եվրոպական պաշտպանության գործակալության (EDA) տարեկան համաժողովում։
Նա մանրամասներ չի ներկայացրել Կրեմլի ագրեսիայի հավանական ծրագրերի մասին։ Միաժամանակ, Կալլասը ենթադրություն է հայտնել, որ Եվրոպան ժամանակ է շահում, քանի դեռ Ուկրաինան պաշտպանվում է ռուսական ներխուժումից: Հետևաբար, ԵՄ-ի առաջնահերթությունը մնում է Կիևին շարունակվող ռազմական օգնությունը:
«Կասկած չկա, որ մենք կարող ենք ավելին անել Ուկրաինային օգնելու համար: Մեր օգնությամբ նա կարող է հաղթել պատերազմում»,- վստահեցրել է եվրոպացի գործիչը:
ԵՄ բարձրաստիճան դիվանագետը կոչ է արել միության անդամ երկրներին ավելացնել ներդրումները պաշտպանության ոլորտում և ոչ միայն գումար ծախսել պատերազմը կանխելու, այլ նաև դրան նախապատրաստվելու համար:
ԱՄՆ նախագահ Դոնալդ Թրամփն իրավացի է, երբ ասում է, որ եվրոպացիները բավականաչափ չեն ծախսում պաշտպանության վրա, շեշտել է եվրոպական դիվանագիտության ղեկավարը։
Կայա Կալլասի խոսքով՝ Մոսկվան ներկայում գրեթե հինգ անգամ ավելի շատ բյուջե է ծախսում ռազմական նպատակների համար, քան Բրյուսելը. 2024 թվականին ԵՄ երկրների պաշտպանական ծախսերը կազմել են ՀՆԱ-ի միջինը 1,9 տոկոսը, մինչդեռ Ռուսաստանի ցուցանիշը կազմել է 9 տոկոս:
Թարգմանությունը՝ Տաթև Ֆռանգյանի
