08.10.2026 | 18:02
Փարիզում քննարկվել է ապաստանի գործերով մասնագիտացված դատավորներ ունենալու հնարավորությունը
Իսրայելի պաշտպանության նախարարը կարգադրել է ՀԱՄԱՍ-ին ջախջախելու ծրագիր նախապատրաստել
Քաղաքականություն
10.01.2025 | 22:44
Իսրայելի պաշտպանության նախարար Իսրայել Կացը հայտարարել է, որ զինվորական հրամանատարներին հանձնարարել է Գազայի հատվածում ՀԱՄԱՍ-ի «լիակատար ջախջախման» ծրագիր պատրաստել, եթե իսրայելցի պատանդները չազատվեն մինչև ԱՄՆ նորընտիր նախագահ Դոնալդ Թրամփի երդմնակալության արարողությունը։ Այս հարցը քննարկվել է հունվարի 9-ին Իսրայելի բանակի հրամանատարության հետ հանդիպմանը, գրում է The Times of Israel-ը:
«Մենք չպետք է ներքաշվենք քայքայման պատերազմի մեջ, որը թանկ կարժենա մեզ և չի հանգեցնի հաղթանակի ու ՀԱՄԱՍ-ի ամբողջական ռազմավարական պարտության և Գազայում պատերազմի ավարտի»,- ասել է Իսրայել Կացը։
Նրա խոսքով՝ եթե պատանդների հետ կապված գործարքն ավարտին չհասցվի մինչև Դոնալդ Թրամփի՝ ԱՄՆ նախագահի պաշտոնը ստանձնելը, ապա ՀԱՄԱՍ-ը պետք է «լիովին պարտվի»:
Բարձրագույն ռազմական հրամանատարությանը հանձնարարվել է պատրաստել համապատասխան պլան և հաշվի առնել մանրամասները, որոնք կարող են բարդացնել այս նպատակի իրագործումը։
Նշվում է, որ ծրագիրը կներկայացվի իշխանություններին՝ «անհրաժեշտ որոշումներ» ընդունելու համար։
Դեկտեմբերին առաջընթաց էր արձանագրվել գործարքի շուրջ բանակցություններում, որը, ըստ ԶԼՄ-ների տեղեկությունների, կարող էր ստորագրվել մինչև 2024 թվականի ավարտը: ՀԱՄԱՍ-ը մեծ զիջումների էր գնացել և հրաժարվել էր բոլոր ռազմական գործողությունները դադարեցնելու և Գազայի հատվածից ամբողջությամբ իր զորքերը դուրս բերելու՝ Իսրայելին ներկայացված պահանջից: Սակայն հետագայում դժվարություններ առաջացան պատանդների ու պաղեստինցի գերիների փոխանակման մանրամասները համաձայնեցնելու հարցում։
Իսրայելը և Միացյալ Նահանգները պաղեստինցի զինյալներին մեղադրել են պայմանավորվածությունները խախտելու մեջ:
Թարգմանությունը՝ Տաթև Ֆռանգյանի
