Քաղաքականություն
07.01.2025 | 18:13
Կրեմլը հայտնել է, որ ՌԴ նախագահ Վլադիմիր Պուտինը խնդրել է իր անվան սկզբնատառերը փորագրել խաչերի շղթաների վրա, որոնք բաժանվելու են Ուկրաինայի դեմ մարտերին մասնակցող ռուս զինվորականներին։ Հունվարի 7-ի գիշերը Պուտինը Պոկլոննայա բլրի վրա գտնվող եկեղեցում մասնակցել է Սուրբ Ծննդյան պատարագին, որից հետո գնացել է Քրիստոս Փրկչի տաճար, փոխանցում է Ազատություն ռադիոկայանի ռուսական ծառայությունը։
Նշվում է, որ այնտեղ Համայն Ռուսիո պատրիարք Կիրիլը պետության ղեկավարի խնդրանքով և նրա ներկայությամբ օծել է խաչերն ու սրբապատկերները զինվորականների համար: Նախագահը պատրիարքին ասել է, որ հավատքի խորհրդանիշները փոխանցվելու են զորախմբերի հրամանատարներին։
Պուտինը Սուրբ Ծնունդը եկեղեցում տոնել է՝ շրջապատված ռուս ընտանիքներով, որոնց նա հանդիպել էր անցյալ տարի: Նրանց թվում, մասնավորապես, եղել են պատերազմի մասնակիցներ, ինչպես նաև կամավորներ, հաղորդել է ՌԻԱ Նովոստին:
Ռուս ուղղափառ եկեղեցու Մոսկվայի պատրիարքարանը լայնամասշտաբ ներխուժման հենց սկզբից աջակցում է Ուկրաինայում ՌԴ իշխանությունների գործողություններին։ Ռուսական եկեղեցին պատարագում ներառել է պարտադիր աղոթք «Սուրբ Ռուսաստանի հաղթանակի համար»: Այն կարդալուց հրաժարվելու համար քահանաներին արգելում են պատարագ մատուցել, զրկում կոչումներից կամ տուգանում։
Թարգմանությունը՝ Տաթև Ֆռանգյանի
